No Libro A Sakaryas.
1.
Do chawawaho naw a kabohan, do chadadwaw a katawen no kapagtoray ni Daryos a impirador do Persya, inpakatoneng ni ĀPO minsāhi naw di propīta Sakaryas a pōtot ni Berekayah a apoko ni Iddo. 
Binata ni ĀPO dya a kāna, “Taywaraw nakapakasoli ko dyirad kapoonan nyo saw. 
Dawa, ibahey mo do tawotawo saya: Nyaw batahen ko a ĀPO a Manakabalin do Tābo a kāna, ‘Maybidi kamo na dyaken tan maybidi ako na dyinyo.’ 
Toladen nyo sabaw kapoonan nyo saw a nangibaheyan dan nanmanma saw a propīta so inpaibahey kwaw a kon ko, ‘Tadyichokodan nyo naw marahet saya kaparin kan marahet saya dadakay nyo.’ Ki akmaw abo tadyinya da, kan inkaskāso daba yaken. 
Siraw kapoonan nyo saw, yanan darana? As siraw propīta saw, nanayon sawri a sibibyay? 
Ki siraw bilbilin kan pangeddeng ko saw a inpaibahey ko dyirad pachirawatan ko saw, ki nanayonayon abawri kan siraw kapoonan nyo saw? Sinpangan na, nagbabāwi sa kan inpodno da a yaken a ĀPO a Manakabalin do Tābo, ki dinōsa ko sa sigon do pinarin daw kan akmas inkeddeng kwaw a parinen.” 
Do chadadwa naw a poho kan apat a karaw, do chaasa poho naw kan asa a kabohan, iyaw bohan naw no Sebat, do chadadwa naw a katawen no kapagtoray ni Daryos, inpakatoneng dana ni ĀPO minsāhi naw di propīta Sakaryas a pōtot ni Berekayah a apoko ni Iddo. 
Binata ni Sakaryas a maynamot do parmata naw a kāna, “Do kamahep, nakaboya akos tawo a nakasakay do mabaya a kabalyo! Myanaw a nagsardeng do bongrowaw do payahosonganaw. Do dichodan naw myan saw nakasakay dyirad kabalyo a mabaya, nahoto so kīta, kan maydak.” 
Sinpangan na, inyahes ko a kon ko, “Mo āpo, āngo saw nya?” Binata no anghilaw a machisisirin dyaken a kāna, “Ipaboya ko sa dyimo an āngo chakey a batahen nya saya.” 
Dawa, binata no tawowaw a nagsardeng do bongrowaw a kāna, “Tinoboy san ĀPO nya saya magwanawan do intīrwaya lōbong.” 
Do dāwri, inpadāmag dan nakasakayaw do kabalyo saw nya do anghilaw ni ĀPO a nagsardeng do bongrowaw a kon da, “Winanawanan namenaw intīrwaya lōbong, kan natonngan namenaw a maolimek kan matalna.” 
Sinpangan na, binata no anghilaw ni ĀPO a kāna, “O ĀPO a Manakabalin do Tābo, māngo pas kahay sakbay no kaipaboya mos kāsi mo dyirad tawotawo saw do Jerosalem kan do idi saw do Joda, ta papito danaya poho a katawen no kasoli mo dyira?” 
Ki naychirin si ĀPO so makahwahok a chirin do anghilaw a nachisisirin dyaken. 
Do dāwri, binata no anghilaw a machisisirin dyaken a kāna, “Ikasaba mo nya: Iyaw nyaw bata ni ĀPO a Manakabalin do Tābo a kāna, ‘Oltimo kaīmon ko so Jerosalem kan Sion a yanan Timplo. 
Taywaraw kaisoli ko so nasyon saya a masaray dana. On, insoli ko saw so dēkey tawotawo ko saya, ki pinangāngayan dayan nasyon saya linidyalidyat.’ 
“As dawa, nyaw bata ni ĀPO a kāna, ‘Naybidi ako na do Jerosalem a mangipaboya so kāsi. As iyaw Timplo ko, ki mirwanchi a mapatnek, as kan komwan anchi a makapya anchiw syodadaw.’ ” 
Inbahey no anghilaw a machisisirin dyaken a ikasaba ko pa nya: “Nyaw batahen ni ĀPO a Manakabalin do Tābo a kāna, ‘Siraw idiidi ko saya, ki magliplipyas dananchiw kapaypaganay. As yaken a ĀPO, ki ahwahoken ko na sanchiw tawotawo do Sion, kan pidyen ko naw Jerosalem a mirwa.’ ” 
Sinpangan na, tomnangay ako, ki nakaboya ako so apat a olong! 
Do dāwri, inyahes ko do machisisirinaw dyaken a anghil a kon ko, “Āngo saw nya?” Ki tinbay na a kāna, “Siraw nya olong, pachiparihwan dan mabīleg saya nasyon do lōbong a napaychawpit so tawotawo do Joda, Israel, kan Jerosalem.” 
Do dāwri, inpaboya dyaken ĀPO apat saw a manyichīpo. 
Ki binata ko a kon ko, “Āngo parinen dan nya saya?” Ki tinbay na yaken a kāna, “Siraw olong saya, ki pinaychawpit da saw tawotawowaw do Joda tan abo tawo a makaitored. Ki siraw manyichīpo saya, ki yangay da sa amomohen kan paksyaten nasyon saya a nanghomis kan napaychawpit so tawotawo saya do Joda.”