Haggeo.
2.
Do chadadwaw a katawen, do chadadwa naw a poho kan asa karaw, do chapapito naw a bohan a nakapagtoray ni Āri Daryos, nya danaw inpakatoneng ni ĀPO di propīta Haggeo a kāna, 
“Maychirin ka di Serobbabel a pōtot ni Salatiel a gobirnador do Joda kan di Joswe a pōtot ni Jehosadak a katotohosan a pādi, kan dyirad tawotawo saw a nakapaybidi yapo do nakaakaw daw do Babilonya. Yahes mo dyira a kon mo, 
‘Aryori dyinyo makanakem pa so nya Timplo do sīgodaw a kapintas na? Maypāngo kaboyan nyo na sya changori? Akma abawriw abos sinpaspangan? 
Ki sichangori, payiten mo kapangtokto mo, imom Serobbabel. Masaw payiten mo kapangtokto mo, imom Joswe a pōtot ni Jehosadak a katotohosan a pādi, as aran inyo tabo a tawotawo a omyan do tana. Maytarabāko kamo do Timplo, ta myan ako dyinyo,’ batahen ni ĀPO a Manakabalin do Tābo. 
Tinongtong na a kāna, ‘Akmas nakapachitōlag kwaw dyinyo a dyi koynyo a nonolay do nakahtot nyowaw a yapo do Egipto, nāw ko pa dyinyo. Dawa, mamo kamo aba.’ 
“Nyaw inpakatoneng ni ĀPO a Manakabalin do Tābo a kāna, ‘Mahay pabaw kagoyogoyon ko so kahanyihanyitan, lōbong, tāw kan mabkoh a tana. 
Gon-gonen konchi a tabo nasnasyon, kan siraw mapapateg saw a warawara dan nasnasyon, ki maiyangay sanchi do dya a Timplo, as kan apnohen konchiw nya Timplo so kinabaknang. 
Dyaken a tabo pirak kan balitok do dya lōbong. 
Madaydayag anchiw bayowaya a Timplo kan adanaw. As do dya yanan, itoroh konchi dyirad tawotawo ko kaydamnayan no kapangtokto da,’ batahen ni ĀPO a Manakabalin do Tābo.” 
Do chadadwa poho kan apat a karaw, do chasasyam naw a kabohan, do chadadwaw a katawen no nakapagtoray ni Daryos, inpakatoneng dana ni ĀPO minsāhi naw di propīta Haggeo a kāna, 
“Nyaw batahen ni ĀPO a Manakabalin do Tābo a kāna, ‘Iyahes mo dyirad papādi saw an āngo batahen linteg maynamot do nya kapanahes: 
An kaspangarīgan, mangibolsaw asa tawo so naidāton a karni do mayidaw a laylay na. An mapadnet laylay naw do tināpay mana nahoto a mākan, palek, lana mana aran āngo a ibodek, mayparinori a masantwan no nakapadnetan naya?’ ” Ki tominbay saw papādyaw di Haggeo a kon da, “Engga ah.” 
Inyahes dana ni Haggeo a kāna, “Na, an kaspangarīgan, myan asa tawo a naibidang a nalaposan a maynamot do nakapakasalid nas bangkay. An manalid so aran āngo dyirad nya saya mākan, ki malaposan pa sawriw kanen saya?” “Naon ah. Mayparin a malaposan,” tinbay dan papādyaw. 
Do dāwri, binata ni Haggeo a kāna, “Batahen ni ĀPO a kāna, ‘Akma syay maparin dyaya tawotawo do dyaya nasyon do salapen ko. Tabo kaparin da kan tabo idāton da, ki naibidang a malapos.’ ” 
“Inpakatoneng pa ni ĀPO a kāna, ‘Sichangori, amirīsen nyo naparinaw dyinyo do sakbayaw no nakairogi nyo so kapirwa nyo a mapatnek so Timplowaya. 
Do nakangay nyowaw do nakawpwanaw no trīgo, kan hinahaw nyo a makahap kamo so dadwa poho a kasalop, ki asa poho lang a kasalop nahap nyo. Do nakangay nyowaw do pangapyan nyowaw so palek tan makatabo kamo so dadima poho a kagalon, dadwa poho lang natabo nyo. 
Rinārayaw ko tabo pinādas nyo a inmoha so ganyit, domalangdang a salawsaw a yapo do dāya kan naychahesday a yilo, ki alit na dyi kamo a naybidi dyaken. 
Makayapo sichangori a araw, do chadadwa naya poho kan apat a araw, do chasasyam naya kabohan, amirīsen nyo nakapatnek danaya no pondasyonaya no Timplo. 
Apabaw natokos a binyi do agāmang. Ari pad omsiw obas, igos, granada, kan olibo. Ki aran komwan, makayapo sichangori, bindisyonan ko mohamoha nyo.’ ” 
Do dāwri a araw, do chadadwa naw a poho kan apat a karaw no bohan, inpakatoneng ni ĀPO no somarono a minsāhi na di Haggeo a kāna, 
“Ibahey mo di Serobbabel a gobirnador do Joda a mahay pabaw kagoyogyoyon ko so kahanyihanyitan kan lōbong. 
Abohen ko sanchiw pagāryan, kan akteben konchiw panakabalin da. Albahen ko sanchiw logan daw a goyoden kabalyo a pachigobat kontodo nakasakay saw. On, malba sanchiw kabalyo saw kan siraw nakasakayaw, as kan maysintatabtab sanchi pakairamānan kabalyo saw no katakatayisa. 
“ ‘Do dāwri a araw,’ bata ni ĀPO a Manakabalin do Tābo a kāna, ‘Ahapen konchi imo mo Serobbabel a pachirawatan ko, imo a pōtot ni Salatiel, kan tongdohen koymo a magtoray do ngaran ko, ta pinidi ko imo,’ batahen ni ĀPO a Manakabalin do Tābo.”