No Libro A Nahom.
1.
Nyaw minsāhi maynamot dyirad taga Ninebeh a inpaltiing ni ĀPO di Nahom a taga Elkos. 
Si ĀPO, ki mangīmon kan mamahes a Dyos. Si ĀPO, ki mamahes kan mapno so kasoli. Si ĀPO, ki mamahes dyirad komontra dya, kan isagāna naw soli na dyirad kabōsor na. 
Si ĀPO, ki malisto aba makasoli, ki abaw akmas kabīleg na. Mainonolay na saba polos nakagatos a dya madōsa. No ayaman ni ĀPO, ki myan do alipogpog kan bagyo, as siraw demdem, ki akmay ahbek no kokod na. 
Mangilyak so tāw, ki mayachan, as kan abkohan na paw ok-oksong saw. Do Basan kan Tokon a Karmel, ki mahayo mohamoha. As makolay dana saw sabong do Lebanon. 
Siraw tokotokon, ki magoyogoyon sa a maynamot dya, as kan maloyo saw paytoytokonan. Iyaw tanaya, ki magin-gined do salapen na, as kan tabo tawotawo, ki maychamirpirpir. 
Sino paro makapaytēnek do oltimo a soli na? Sino paro makaibtor so karanggas no soli na? Iyaw taywara a kasoli na, ki bomtak a akmay apoy, kan siraw bato, ki makchikchid sa do salapen na. 
Si ĀPO, ki maganay, salōkob do chimpo no riribok. Aywanan na sa tabo machikāmit dya. 
Ki do mapaboswang a layos, lyoden na sanchiw komontra dya do kadimanan da, as kan lakatan na sanchiw kabōsor na do kasaryan. 
Aran āngo pangta da di ĀPO, ki akteben na sa. Makapirwa pabaw mangriribok sya. 
Ta akma saw napitipitan kamanadyit, kan nabok sa do kaynoynom da. Masosohan sanchi a akmas nabkohaw a garami. 
Yapo dyinyo a taga syodad a Ninebeh, minohtot nangipangta so kontra di ĀPO, kan namagbaga so marahet. 
Nyaw bata ni ĀPO dyirad tawotawo naw a Joda a kāna, “Aran mabīleg kan āro saw taga Assirya, ki alit na marārayaw kan mabo sanchi. Aran do nakarahan, dinōsa koynyo, inyo a Joda, ki pirwahen ko pabanchi inyo a dosāen. 
Changori, pototen ko naw pāko do lagaw nyo, as kan alngaten ko saw kadina a pinangigālot da dyinyo.” 
Nyaw inbilin ni ĀPO a maynamot dyirad taga Ninebeh a kāna, “Apabanchiw kapotōtan nyo a mangosar so ngaran nyo. Rārayawen ko sanchiw didyosen nyo do timplo dan dyos nyo, kan isagāna konchiw tanem nyo, ta maikari kamo aba maybibyay.” 
Inyo a tawotawo ko do Joda, chiban nyo do tokotokon saya, ta īto danaw toboyen kwaw a mangyangay so maganay a dāmag a mangipakatoneng so maynamot do kapaychapya! Isagāna nyo a silibaren saw pista nyo, inyo a tawotawo a Joda, as kan tongpalen nyo insapata nyo do Dyos. Siraw marahet, polos a dyi dana sa mirwa a mangraot dyinyo, ta marārayaw sanchi a golpi.