Mikyas.
2.
Kapakāsi da panchi no magplāno so marahet, kan siraw mangipangtaw do pakaychehan da! Apāman a maysesēdang, maychakatekateh sa mangipatongpal maynamot ta myan gondaway da a mamarin sya. 
An myan saw bengkag a agōmen da, tod da sodiben. Masaw do bahabahay, ki tod da agāwen. Sikāpan daw tawo tan madyira daw bahay na, kan takawen daw tāwidaw no pamilya na. 
Dawa, nyaw bata ni ĀPO a kāna, “Iplāno ko kaiyangay ko so didigra dyinyo a akmanchiw pāko a dya mapakaro do lagaw nyo. Arabanchiw kapangas nyowaw a mayam, ta chimponchi no didigra nyo. 
Do dāwrinchi a chimpo, oyawen danchinyo do kaikansyon da so nya kanta a kapakaōpay dyinyo: ‘Komplito danaw nakarārayaw namen! Inhap dana ni ĀPO iyaw tana namen, kan intoroh naranaw bengkag namen dyirad nanglipot dyamen.’ ” 
Dawa, apabanchi dyirad tawotawo ni ĀPO mangibinglay so tana daw. 
“Mangipadto kaba,” bata dan sinan propīta da saw. “Ikasaba mwabaw komwan. Marapit abanchi yaten pakasnesnekan!” 
Machitawri a ibahey nya, inyo a kapotōtan ni Jakob? Tomnawos danawriw kaānos ni ĀPO a mapatongtong so nawri? Mangahwahok abawriw chirin na saya dyirad maybibyay a malinteg? 
No atbay ni ĀPO, ki kāna, “Ki rinaot nyo saw tawotawo ko a akma nyo say kabōsor? Pinalang nyo a binahas laylay daw no homabas saw a sitatalna a akma siras maybidi a yapo do gobat. 
Pinaksyat nyo mababakes saw a bālo do bahabahay a chadaw da. Inkaro nyo abos pandan a inpatāwid ko dyirad anak da. 
Maytēnek kamo, kan komaro kamo na! Do dyabaw paynahahan nyo, ta linaposan nyo na so gatos nyo, kan rinārayaw nyo na golpi. 
An myan maybayataw kan mangallīlaw a makabata sya a kāna, ‘Ipadto ko a moyog anchi dyinyo palek kan arak,’ iyaw nyaw kombini a propīta dan nyaya tawotawo!” 
Bata ni ĀPO a kāna, “Sigorādo a akpehen konchi inyo a tabo a Jakob. Sigorādo a akpehen ko sanchiw nakalāsat a tawotawo no Israel. Paychichipehen ko sanchi a akmay karniro do koral, as kan akmay arban do pasto na. Iyaw tana da, ki mirwa dananchi a mapno so tawotawo a maariwāwa.” 
Manma anchi Si ĀPO a manyiwang a mangihtot sa yapo do nakaakawan daw. Mawlot sanchi a mohtot do rowanganaw no syodad. Iyaw āri daw, ki manma anchi a mohtot. Si ĀPO anchi a mismo mangidaōlo do kahtot da.