No Libro A Mikyas.
1.
Nyaw minsāhi a inpakatoneng ni ĀPO di Mikyas a taga idi a Moreset a maynamot do kaokom no Samarya kan Jerosalem. Naboya naw nyaya do chimpwaw a nakapagāri da Jotam, Ahas, kan Hesekyas do Joda. 
Mangadngey kamo, inyo a tabo a tawotawo. Adngeyen nyo nyaya, inyo a tabo a omyan do tanaya! Si Āpo a DYOS, mangsaksi so maibōsor dyinyo. Adngeyen nyo, ta maychirin a yapo do masantwan a timplo na. 
Chiban nyo! Īto dana si ĀPO a yapo do masantwan a yanan na. Gomchin anchi kan lasagan na sanchiw matotohos saya a tokotokon do tanaya. 
Siraw katokotokonan saya, ki malonag sa a akmas nadangdangaw a alid do apoy. Maloyo sanchi do payahosongan saya akmay ranom a gomtos do aphas. 
Tabo nyaya, maparin anchi maynamot ta nagribīldi saw kapotōtan Jakob. On, maparin nya a maynamot ta naygatos saw kapotōtan Israel. Āngo iyaw gatos dan kapotōtan Jakob? Iyabawriw karahet dan tawotawo no Samarya? Dino sintro no pagdaydayāwan so didyosen do Joda? Do Jerosalem abawri? 
Bata ni ĀPO a kāna, “Dawa, payparinen konchiw Samarya a bonton a yanan a paymohan so kaobāsan. Paychabadebadedehen konchiw bato na saw do payahosonganaw tan magparang saw pondasyon na. 
Mapsapsa sanchiw didyosen na. Tabo mapapateg saw a nakpeh na do timplo, ki masosohan sanchi so apoy. Rārayawen ko sanchi a tabo bolto na saw. Maynamot ta nakpeh saw nya a yapo do tangdan daw no maglaklāko saw so asi, tangdan dananchi a mirwa no matarek a maglaklāko so asi do matarek a nasyon.” 
Binata ni Mikyas a kāna, “Maynamot do dyaya, magāsog kan magdongdong-aw ako. Mayam ako a abos tokap kan silalābos. Maydawo ako a akmas bolawaw a chito, kan maylilyak ako a akmay gokgok. 
Mapya pabaw bigaraw no Samarya, kan nayadis dana do Joda. Nakarapit dana do rowanganaw no syodad dan tawotawo ko a aran do Jerosalem a mismo.” 
Ibahey nyo aba do kabōsor ta saya do syodad a Gat iyaw nakaābak ta. Maychahoho kamo abas aran asa katedted. Inyo a tawotawo do idi a Beth-leapra, maydipodiporis kamo do ahbek do ladingit nyo. 
Inyo a tawotawo do idi a Sapir, maakaw kamonchi a mabahod, kan mayam kamonchi a silalābos a masnek so kayayan. Inyo a tawotawo do Saanan, makahtot kamo paba do idi nyo. Anchan madngey nyo kapagdongdong-aw da do idi a Bet-esel, matonngan nyonchi a abaw kamāngan daw. 
Siraw tawotawo do idi a Marot, manghahaw sa so kapakalong-aw da, ta iyaw didigraya a yapo di ĀPO, ki narapit narana a manda do rowangan no Jerosalem. 
Inyo a tawotawo do idi a Lachis, isagāna nyo kabalyo nyo do logan nyo a pachigobat. Inyo nangisongsong so Jerosalem a naygatos, ta tinahatahan nyo gatos daw no Israel. 
Dawa, manoroh kamos sagsāgot a pamakāda do idi a Moreset-gat. Iyaw idi a Aksib, ki inallīlaw na saw āri saya no Israel. 
Inyo a tawotawo do idi a Maresah, manoboy si ĀPO so mangsākop so idi nyo. Siraw pangpangōlo no Israel, mangay sanchi a tomayo do aschip no Adollam. 
Inyo a tawotawo do Joda, chischisan nyo oho nyo do kapagmamayo nyo maynamot dyirad anak nyo saw a chadaw nyo. Chischisan nyo oho nyo a akmas oho naw no kangkang maynamot ta maakaw sanchiw anak nyo a sibabahod.