Siraw Dongdong-aw.
1.
Ay, āngwa kapaychatanyi danan syodad a Jerosalem a napno so tawotawo do nakarahan! Ay, āngwa nakapayparin na a akmay bālo a do napahabas, ki mabīleg dyirad nasnasyon! Iya a prinsisa do nakarahan dyirad probinsya, ki nayparin dana asa adīpen sichangori. 
Taywaraw katanyis na an mahep Moyog saw hō do pisnyi na. Dyirad tabo saw a madaw dya, ki abaw mangahwahok sya. Tabo dan sīt na, ki linipotan da. Nayparin dana sa kabōsor na. 
Naikaro dana si Joda a nabahod a taywara natotōok kan palālo so nakaadīpen. Machiyan dana dyirad gan-ganaet a nasnasyon. Abaw madongso na paynahahan na. Tabo dan nangpaskad sya, ki nadas da iya a naiyapiki da a abo dana so kwanan. 
Siraw rarahan a komwan do Sion, ki magdongdong-aw, ta abaw mangay do naitongdo saw a pista na. Tabo dan rowangan, ki nainonolay dana sa. Magas-āsog saw papādi na. Siraw babbalāsang na, ki tomanyitanyis sa. Ay, āngwa kakpad no kapagtōok na. 
Siraw kakontra na, ki nayparin sa a āmo na. On siraw kabōsor na, ki ikinkinakin da. Si ĀPO, nangyangay so kapagmamayo dya maynamot do āro a gatogatos na. Siraw anak na, ki naikaro dana sa a nabahod do salapen dan kabōsor na. 
Tabo no kinadayag na, ki komnaro a yapo do Balāsang no Sion. Siraw prinsipi na, ki akma say ogsa a dya makadongso so pagarāban da. Nayyayo sa aran napatawos danaw kayit da do salapen dan manglakat saw dyira. 
Do araw sa kapagtotōok kan kapayadiyadis, nanakem sa no Jerosalem tabo mapateg a dyinira na do nakahabas. Do nakaābak dan tawo na do tanoro dan kabōsor, abaw somnidong sya. Nangorirat saw kabōsor naw, as nakamimyeng da sya do nakarārayaw na. 
Jerosalem, ki taywaraw nakapakagatos na. Dawa, nayparin dana a malapos. Tabo no nanganyi-anyib sya, ki indadanes darana, ta naboya daw kasilalābos na. Mismo a iya, ki pagas-asog na, kan itayo naranaw rōpa na do asnek na. 
Komnoyapet danaw kalapos na dyirad imara na, ta iniktokto nabaw masakbayan na. Dawa, makaam-amak nakasday na. Abaw mangahwahok sya. Bata na a kāna, “Chiban mom ĀPO katotōok ko, ta nagballīgi iyaw kabōsor.” 
No kabōsor, ki inlonat na saw tanoro na a nangāgaw so tabo mapateg dya. Naboya na saw soldādo dan gan-ganaet a nasnasyon a somindep do masantwan a yanan. On, naboya na saw binaywan ni ĀPO a somdep do kakpekpehan dan tawotawo na. 
Tabo no tawotawo na, ki magas-āsog do kayan da naychichwas so kanen da. Pinanādi da saw kinabaknang da so chabyay da a mantinir no inawan da tan mabyay sa. Bata no syodad a kāna, “Chiban mo pam ĀPO, ta maidadanes ako. 
“Abawriw bibyang nyo, inyo a tabo a homabas? Manyideb kamo do omdibon, kan chiban nyo a abaw kapagmamayo a akmas kapagmamayo ko a inpasabhay dyaken ni ĀPO do arawaw a kataywara no kasoli na. 
“Yapo do hanyit nangasday si ĀPO so apoy a somindep a mangsosoh so tohatohang ko. Nangipākat so asdok para do kokod ko, as pinatadyichokod na yaken a penpenen. Ninonolay narana yaken a makey a mapleng a maychasaryan. 
“Nareppet saw gatos ko a nayparin a akmay pāko. No tanoro na saw namedbed sira. Naipasadin sa do lagaw ko, kan sinepsep daw kayit ko. Inparawat na yaken ni Āpo dyirad dyi ko saw a matēnekan a abāken. 
“Tod dana sa dyābat ni Āpo tabo mabibīleg saw a taga-gobat a myan dyaken. Tinawagan na saw bōyot a mangkontra dyaken a namitapita siras babbaro ko. Akmay pamīsan so ōbas, tinokatokapan ni Āpo iyaw Birhin a Balāsang no Joda. 
“Nya saw paynamotan na a tomanyis ako. Maychawoyog hō ko yapo do mata ko. Abaw masngen a mangahwahok dyaken. Abaw mapaydyegegla so ispirito ko. Nainonolay dana saw anak ko, ta napadso darana sa no kabōsor.” 
Patohosen no Sionaw tanoro na a mangdakdaw, ki abaw mangahwahok sya. Nangikeddeng si ĀPO so maikontra di Jakob a siraw karoba na, ki mayparin sa a kabōsor na. Jerosalem, ki nayparin dana a akmay malapos a boboyas dyira. 
Bata no syodad a kāna, “Malinteg si ĀPO, ta nachiribīldi ako do chirin na. Ki adngeyen nyo, inyo a tabo a tawotawo, kan chiban nyo katotōok ko. Siraw kamotdehan ko a babbaro kan babbalāsang, ki naikaro dana sa a nabahod. 
“Tinawagan ko saw madawaw dyaken, ki pināay da yaken a dyi sa nangay a somnidong. Siraw papādi ko saw kan papanglakayen ko, ki nadiman dana sa do syodad do kayan da a naychichwas so mākan a mantinir no inawan da tan mabyay sa. 
“Chiban mo pam ĀPO, ta taywara kariribok ko! Matotōok pahad ko. As iyaw pōso ko, ki palālo a makamikamyaba, ta taywaraw nakapachiribīldi ko. Do gagan do kalkalsāda, ki mapagdong-aw ispāda. Do irahem no bahay, ki maynana kadiman daw. 
“Nadngey dan tawotawo kapagas-āsog ko, ki abaw mangahwahok dyaken. Tabo dan kabōsor ko, ki nadngey daw kariribok ko. Charagsak daw pinarin mo. Iyangay mo na pakono arawaw a inbahey mo tan mayparin sa a akma dyaken. 
“Maipasalap pakono dyimo tabo karahet da. Dosāen mo sa pakono a akmas nakadōsa mo dyaken maynamot do tabo gatogatos ko. Āro danayaw kapagas-āsog ko, kan mahah danayaw pōso ko.”