Kapapatgan a Kanta.
2.
Yaken, ki akmay rosas do Tanap a Saron, kan akmay bakong a tomobo dyirad tantanap. 
Akmas bakong do kanonōlokan, komwan si Ipatpateg ko dyirad babbalāsang. 
Akmay kayo no mansanas dyirad kayokayo do kahasan, komwan si Chadaw ko dyirad babbaro. Chasoyot ko maydisna do abongan na, kan no asi na, ki maīmas do kapanaham ko. 
Inyangay na yaken do bahay a pagpaskenan, kan inpaboya na daw kadaw na dyaken. 
Payiten na pakono yaken so inpakan na a tināpay a pasas. Pasaliwawaen na pakono yaken do mansanas, ta maydyagānyit ako do taywara a kalakam so kadaw na. 
Payponganen na yaken do kaholi a tachay na, as kepkepen na yaken do kawanan a tachay na. 
Inyo a babbalāsang a taga Jerosalem, isapata nyo pa dyaken dyirad bomaro a ogsa kan bomalāsang a ogsa do katamtamkan a dyi nyo yokayen mana istorbwen adaw mandan kosto a ōras na. 
Ah, madngey ko tīmek ni Chadaw ko a īto dyaken! Lomaglagto dyirad tokotokon, kan homakhaktaw dyirad paytoytokonan. 
Si Chadaw ko, ki akmay mataray a ogsa mana bomaro a ogsa. Chiban pa! Tori a maytēnek do dichodan no dyindyin namen a mangboybōya dyaken do bintan somirsirip do payawan dan rihas no bintan. 
Maychirin si Ipatpateg ko, kan batahen na dyaken a kāna, “Ngay, ka dya mo Chadaw ko. Imo a mapintas ko, ki machirayay ka dyaken. 
Ta chiban pa! Homnabas danaw ammyan. Tayoka danaw chimoy. Mahangan dana. 
Nakachibaw dana saw sabsabong do tana. Narapit danaw chimpo no kapagkankanta. Kapaywāgem dan boyit, ki madngey dana do tana taya. 
Omsi dana saw igos a kayo. Siraw bosak dan ōbas, ki magwaras danaw banglo da. Ngay, ka dya mo Chadaw ko. Imo a mapintas ko, ki machirayay ka dyaken.” 
“Imo a boyit ko, myan ka do ahtahtak daw no bato, do tayotayowan saw do bakrang no tokon, ipaboya mo dyaken rōpa mo. Ipadngey mo dyaken tīmek mo, ta matamiw tīmek mo, kan makadadaw rōpa mo.” 
Tiliwen mo saw bolaw saw a chito. On, siraw tway saw a mayrārayaw siras kaobāsan, ta magbosak dana saw kaobāsan taw. 
Si Chadaw ko, ki dyaken. As yaken, ki dyira na. Pagarāben na saw arban na do kabakongan. 
Sakbay a ipol-oy naw salawsaw do kapaysesēdang, as kakaro dana no sari, somabat ka na mo Chadaw ko, kan mayyayo ka akmay bomaro a ogsa do katokotokonan.