No Libro A Eklesiastes.
1.
Siraw nyaw chirin no Mangnanawo a pōtot ni Dabid, iyaw nagāriyaw do Jerosalem. 
“Abos sinpaspangan! Abos sinpaspangan!” kāna no Mangnanawowaw. “On, polos a abos sinpaspangan! Tābo, ki abaw sinpaspangan na.” 
Āngo mahāhap no tawo do tabo nayhohopagan naw a naybibilagan a tinarabāko na? 
Mawara kan komaro kapkapotōtan, ki alit naya a nāw no tanaya. 
Domadaw araw, kan kasdep na, as kapakalyalisto na maybidi do dinadan naw. 
Magpaabagātan salawsaw, as kairikos na a magpaammyānan. Maydidibon a maybibidi do nakayapwan naw. 
Tabo ok-oksong a moyog a mosok do tāw, ki mapno daba polos tāw. Maybidi sa do nakayapwan daw, kan dawriw oyogan darana mirwa. 
Tabo saw nya, ki makahopag a dya mailawlawag no tawo. Iyaw mata, ki maōma aba manyideb. Iyaw tadyinya, ki mapnek aba mangadngey. 
An āngo myan do nakahabas, ki myan dananchi. An āngo tayoka a naparin, ki maparin dananchi. Aba polos bayo do lōbongaya. 
Aryoriw makabata sya a, “Chayaw bayo”? Ki am-āmang dana myan. Nanmanma pa adayo kan yaten. 
Abaw kanaknakman dyirad nayam saw a kapotōtan. Aran siraw īto panchi, abanchiw kanaknakman da dyirad somarsarono pa a kapotōtan. 
Yaken iyaw Mangnanawowaw a nagāri do Israel do Jerosalem. 
Inpasnek ko a adālen kan chichwasen do kinasīrib tabo mapariparin do lōbongaya. No napatakan ko, ki inparara no Dyos taywara a karahmet do tawotawo. 
Naboya ko tābo napariparin do lōbongaya, kan aba polos sinpaspangan da tabo a akmas manglakataw so salawsaw. 
An āngo madyidwaw, ki maparin aba mapalinteg. An āngo kōrangaw, ki maparin aba maibidang. 
Binata ko do inawan ko a kon ko, “Inakpeh ko marahem a kinasīrib, as inābak ko sa tabo nagtotorayaw do Jerosalem a nanmanma kan yaken. Taywara sanay ako do kinasīrib kan kapakatoneng.” 
Inpasnek ko pa a adālen iyaw kinasīrib. Masaw kapakatoneng ko so kaattit kan kabo no arang, ki bāli, akmakay manglakat so salawsaw. 
Ta an maypāngay kinasīrib, ki ad-adda paw mamayo. An maypāro kapakatoneng, ki mangamangay paw liday.