Esra.
8.
Siraw nyaw pangpangōlo dan partīdos kan siraw nailista sigon do kapotōtan da a nachangay dyaken yapo do Babilonya do nakapagāri ni Impirador Artaekserses: 
no yapo do kapotōtan ni Pinehas, si Gersom; no yapo do kapotōtan ni Itamar, si Daniel; no yapo do kapotōtan ni Dabid, si Hattos 
a kapotōtan Sekanya; no yapo do kapotōtan ni Paros, si Sakaryas, as kan nailista dya sigon do kapotōtan da, ki 150 a mahahakay; 
no yapo do kapotōtan ni Pahat-moab, si Elie-hoenai a pōtot ni Serayas, kan myan dyaw 200 a mahahakay; 
no yapo do kapotōtan ni Satto, si Sekanya a pōtot ni Jahasiel, kan myan dyaw 300 a mahahakay; 
no yapo do kapotōtan ni Adin, si Ebed a pōtot ni Jonatan, kan myan dyaw 50 a mahahakay; 
no yapo do kapotōtan ni Elam, si Jesayas a pōtot ni Atalyas, kan myan dyaw 70 a mahahakay; 
no yapo do kapotōtan ni Sepatias, si Sebadyas a pōtot ni Migel, kan myan dyaw 80 a mahahakay; 
no yapo do kapotōtan ni Joab, si Obadyas a pōtot ni Jehiel, kan myan dyaw 218 a mahahakay; 
no yapo do kapotōtan ni Bani, si Selomit a pōtot ni Josipyah, kan myan dyaw 160 a mahahakay; 
no yapo do kapotōtan ni Bebay, si Sakaryas a pōtot ni Bebay, kan myan dyaw 28 a mahahakay; 
no yapo do kapotōtan ni Asgad, si Johanan a pōtot ni Hakkatan, kan myan dyaw 110 a mahahakay; 
no yapo do kapotōtan ni Adonikam a siraw nanawnawdyaw a nachangay a mayngaran so Elipelet, Jewel, kan Semayas, kan myan dyiraw 60 a mahahakay; 
kan no yapo do kapotōtan ni Bigbay, Otay, kan Sakkor, kan myan dyiraw 70 a mahahakay. 
Yaken si Esra, as kan inakpeh ko sa do oksong a lomogo do logar a Ahaba, kan dawriw nagkampwan namen so tatdo a karaw. Do kapanyidechideb kwaw siras tawotawo kan papādi, nadongso ko sabaw Lebita. 
Do dāwri, tinawagan ko saw pangpangōlo a sa Elieser, Ariel, Semayas, Elnatan, Jarib, Elnathan, Natan, Sakaryas, kan Mesollam. Tinawagan ko pa sa Joyarib kan Elnatan a sira, ki mahahakay a diādal. 
Tinoboy ko sa tabo di Iddo a pangōlo do logar a Kasipya. Inbahey ko saw natoboyaw an āngo ibahey da di Iddo kan kakabagyan na saw a magsīrbi do timplo do Kasipya tan toboyen da dyamen siraw magsirsīrbi para do bahay no Dyos ta. 
Maynamot do kāsi no Dyos namen a myan dyamen, inyangy da dyamen asa makapatak kan masīrib a tawo a si Serebiah kontodo pōtot na sa kan kakabagyan na sa a mahahakay. Asa poho kan wawaho sa a tabo. Sira, ki yapo do kapotōtan ni Mahli a apoko ni Lebi a pōtot ni Israel. 
Inyangay da pa si Hasabyas kan rārayay naw a si Jesayas a yapo do kapotōtan ni Merari. Rārayay da saw kakabagyan naw kan siraw pōtot daw a mahahakay. Dadwa poho sa. 
Otro, nangyangay sa pa so 220 a siraw magsirsīrbyaw do timplo. Siraw nyaw pinatarek ni Āri Dabid kan opisyalis na saw, kan pinatnek da sa a somidong dyirad Lebitaw. Tabo sa, ki nailista no ngarangaran da. 
Do dawri a yanan, do oksong a Ahaba, inmandar ko dyira a magayonar kami tan magpakombaba kami do salapen no Dyos namen, kan akdawen namen a iyaw manoroh so maganay a kaaywan na dyamen do kayam namen kan siraw anak namen kontodo tabo saw a warawara namen. 
Ta chinasnek ko nangdaw di impirador siras soldādo kan kabalyiro na saw a aywanan da yamen do rarahan dyirad kabōsor, ta inbahey namen di impirador a kon namen, “No kāsi no Dyos namen, ki myan do tabo a omchichwas dya, as no rakoh a soli na, ki myan dyirad tomadyichokod dya.” 
Dawa, nagayonar kan nangdaw kami so nya do Dyos namen, ki inatbay naw dasal namen. 
Sinpangan na, pinatarek ko asa poho kan dadwa a mawnonotan a papādi a sa Serebyas, Hasabyas, kan asa poho saw a kakabagyan da. 
Inkīlo ko para dyiraw pirak saw, balitok saw, kan warawara saw a dāton a intoroh no impirador kan siraw mamagbaga na kan siraw opisyalis na kan tabo tawotawo no Israel a maosar do bahay no Dyos namen. 
Inkīlo ko a para dyiraw 25 a tonilāda a pirak, 3,500 a kakīlo no warawara a pirak, 3,500 a kakīlo no balitok, 
20 sabak a balitok a myan so balor a 1000 darik, kan dadwa masileng a tombāga a warawara a myan balor na a akmay balitok. 
Binata ko dyira a kon ko, “Inyo kan siraw nya warawara, ki masantwan di ĀPO. Iyaw pirak kan balitok, ki naitoroh a nainpapōswan a dāton di ĀPO a Dyos no aāmang nyo. 
Bantayan nyo sa maganay manda do kaikīlo nyo sira do kwarto saw no bahay ni ĀPO do Jerosalem do salapen no matotohos saw a papādi, Lebita, kan siraw pangpangōlo do partīdos no Israel.” 
Do dāwri, rinawat dan papādi kan Lebitaw pirak saw, balitok, kan siraw masantwan saw a warawara a nakīlo a maiyangay do bahay no Dyos namen do Jerosalem. 
Do chaasa poho naw kan dadwa a karaw do manōma a kabohan, komnaro kami a yapo do oksong a Ahaba a mangay do Jerosalem. No kāsi no Dyos namen, ki myan dyamen, kan inaywanan na yamen do rarahan tan abo saw kabōsor kan tolisan a mangsaneb dyamen. 
Dawa, nakarapit kami do Jerosalem, kan naynahah kami daw so tatdo a karaw. 
Do chapat naranaw a karaw, do bahay no Dyos namen, inpakīlo namen pirakaw, balitokaw, kan siraw masantwan saw a warawara di Meremot a iyaw pādi a pōtot ni Oryas. Myan daw si Eleasar a pōtot ni Pinehas as kan siraw Lebita a si Josabad a pōtot ni Jeswa kan si Noadiah a pōtot ni Binnoy. 
Nabidangan kan nakīlo tābo, as naitolas no karahmet no tābo. 
Tayokaw nya, siraw naybidyaw a yapo do nakaakawan da, nangidāton sa so dāton a masosohan do Dyos no Israel. Nangidāton sas 12 a tōro a bāka para do tābo saw a trībo no Israel, 96 a tōro a karniro, kan 77 a malloko a orbon a karniro. Nangidāton sa pa so 12 a malloko a kalding a pangdalos so inawan da do gatogatos. Tabo saw nya binyay, ki nasosohan a dāton di ĀPO. 
Inparawat da paw no bilbilin no impirador dyirad gobirnador kan opisyalisaw no probinsya a Laōden no Oksong a Oprates. As sira, ki somnidong sa dyirad tawotawo kan do kapatnek no bahay no Dyos.