2 Ar-āri.
17.
Do chaasa poho naw kan dadwa katawen ni Ahas a āri no Joda, si Hosea a pōtot ni Ela, ki nayparin a āri no Israel do Samarya, kan nagāri so sasyam a katawen. 
Pinarin naw marahet do kapanyideb ni ĀPO. Aran komwan, akmaba so karahetaw a pinarin dan ar-āryaw a nanōma kan iya. 
Somnonget si Salmaneser a āri no Assirya a nangay a nanggobat si Hosea. Intorayan na kan pinīlit na si Hosea a nagbāyad dya so bwis na. 
Ki nadoktalan no āryaw no Assirya a manglilipot si Hosea, ta nanoboy siras tobotoboyen naw a nangay di So a āri no Egipto, kan binayādan na pabaw bwis naw do āri no Assirya, akmas pinarinaw a tinawen. Dawa, inpatiliw iya no āryaw no Assirya, kan inpabahod na. 
Sinpangan na, rinaot no āryaw no Assirya iyaw intīrwaw a tana a Israel, as nangay na linakob syodadaw a Samarya so tatdo a katawen. 
Do dāwri, do chasasyam naw a katawen no kapagāri ni Hosea, iyaw āryaw no Assirya, ki sinākop naw Samarya, kan inkaro na saw tawotawo a Israel a sibabahod a naiyangay do Assirya. Pinachiyan na sa do syodad a Hala, do Gosan a masngen do Oksong a Habor, as kan do idiidi saw dyirad taga Medya. 
Naparin saw nyaya maynamot ta naygatos saw Israelita di ĀPO a Dyos da a nangihtot sira do Egipto do toray ni Paraon a āri do Egipto. Nagdaydāyaw saw Israelita dyirad kadwan saw a dyos. 
Minonot sa do dadakay daw no tawotawo do nasnasyon saw a pinaksyat ni ĀPO do salapen daw no Israelita. Tinōlad da saw dadakayaw a pinatnek da no ar-āri no Israel. 
Siraw Israelitaw, ki sililīmed sa a namarin so dya kosto a maikontra di ĀPO a Dyos da. Napatnek sa so bōkod da a pagdaydayāwan a logar do tabo idiidi da a nairāman idiidi a myan pagwanawananaw kan dyirad syodad a naahadan. 
Napatnek sa so posti saw a bato kan posti saw ni Asera do kāda tōtok no paytokonan, kan do kāda sīrok no mayayabong a kayo. 
Do tabo logar saw a pagdaydayāwan, ki naysosoh sa so insinso akmas pinarin daw no nasnasyon saw a pinaksyat ni ĀPO do salapen da. Namarin sa so marahet a pinangpasoli da si ĀPO. 
Nagdaydāyaw sa dyirad didyosen saw a aran inbahey ni ĀPO a kāna, “Parinen nyo abaw nyaya.” 
Aran komwan, inpaballāag ni ĀPO Israel kan Joda dyirad tabo propīta na kan tabo saw mamadto naw a kāna, “Tadyichokodan nyo saw marahet saw a dadakay nyo. Tongpalen nyo saw bilbilin ko kan pangeddeng ko saw a machonot do tabo linteg a inbilin ko dyirad aāmang nyo a tongpalen da, kan inpaibahey ko dyirad pachirawatan ko sa a propīta sa a para dyinyo.” 
Ki inadngey daba. Basbāli a pinatwa daw oho da akma siras aāmang da saw a dya nagtalek di ĀPO a Dyos da. 
Chinaskeh da saw pangeddeng na, iyaw kapachitōlag na dyirad kapoonan da saw, kan siraw ballāag saw a intoroh na dyira. Minonot sa dyirad abos sinpaspangan a didyosen, kan aran sira mismo, ki nayparin sa abos sinpaspangan. Tinahatahan da saw dadakay dan nasnasyon do omdibon dyira a aran inmandar dyira ni ĀPO a kāna, “Parinen nyo abaw akmas pariparinen da.” 
Ninonolay da tabo bilbilin ni ĀPO a Dyos da, kan namarin sa so para dyira a dadwa nalōnag a napōtar a didyosen da a sinan orbon a bāka, kan posti ni Asera. Naydogod sa a nagdaydāyaw siras tabo a myan do kahanyihanyitan, as kan nagdaydāyaw sa pa di Baal. 
Insakripīsyo da saw anak da a mahahakay kan mababakes a masosohan do apoy. Nangdakdaw sa dyirad mamadtwaw kan manolibaw, as kan inlāko daw inawan da a mamarin so marahet do kapanyideb ni ĀPO a nawriw pinangpasoli da dya. 
Dawa, taywaraw nakapakasoli ni ĀPO dyirad tawotawo do pagāryan a Israel, kan pinaksyat na sa do salapen na. Moyboh a natokos pagāryan a Joda. 
Aran siraw tawotawo no Joda, ki tinongpal dabaw bilbilin ni ĀPO a Dyos da. Inonotan da saw dadakay a pinatnek dan tawotawo no Israel. 
Dawa, chinaskeh ni ĀPO tabo tawotawo no Israel. Pinalidyat na sa, kan inparawat na sa dyirad kakamay da no kabōsor da a akma dyirad mangsamsamaw mandad nakapaksyat na sira do kapanyideb na. 
Do nakapasyay ni ĀPO so Israel do pagāryan ni Dabid, pinayparin dan tawotawo no Israel si Jeroboam a pōtot ni Nebat a āri da. Ki pinatadyichokod sa ni Jeroboam do kawnot da di ĀPO, kan pinaygatos na sa so taywara a gatos. 
Inonotan dan tawotawo no Israel tabo gatogatos a pinarin ni Jeroboam a pōtot ni Nebat. Tinadyichokodan da saba a 
nandad nakapaksyat sira ni ĀPO do kapanyideb na a akmas inpaibahey naw dyirad tabo pachirawatan na sa a propīta. Dawa, siraw tawotawo no Israel, ki naakaw sa a yapo do bōkod da a tana a naiyangay do Assirya, as kan myan sa pa daw. 
Inpaiyangay no āryaw no Assirya siraw tawotawowaw a yapo dyirad syodad saw a Babilonya, Kota, Abba, Hamat, kan Separbaim, as kan pinagyan na sa do idiidi no Samarya a panādi na siras tawotawo no Israel. Siraw gan-ganaet a nangay do Samarya, ki minyan sa do idiidi daw, kan inbidang darana a pinakatāwid da. 
Do kasiknan daw so omyan daw, manganyib saba di ĀPO. Dawa, nanoboy so lion sa a nangay dyira, kan diniman daw kadwan dyira. 
Naipadāmag nyaya do āryaw no Assirya: “Siraw tawotawowaw a inpaiyangay mo kan napagyan do idiidi saw do Samarya, ki chapatak daba an āngo linteg no dyos do dawri a tana. Dawa, maynamot ta komwan, nanoboy siras lion a nangay dyira kan diniman daw kadwan dyira.” 
Sinpangan na, inmandar no āryaw no Assirya a kāna, “Pabidihen nyo asa dyirad papādyaw a naikaro nyo a yapo do Samarya. On, palobōsan nyo iya a mangay a omyan daw kan inanawo na saw tawotawowaw daw an āngo linteg no dyosaw no tana daw.” 
Dawa, asa dyirad papādyaw a naikaro a yapo do Samarya, ki nangay a minyan do Betel, kan innanawo na sa an maypāngo manganyib di ĀPO. 
Aran komwan, kāda gropo a gan-ganaet a omyan do Samarya, ki namarin so bōkod na sa a didyosen, kan pinangay da dyirad pagdaydayāwan do matohos saw a logar a pinatnek dan Israelita a naikaro yapo do Samarya. On, komwan pinarin kāda gropo do idiidi a pagyanan da. 
Siraw taga Babilonya, ki namarin sa so didyosen a dyos da a Sokkot-benot. Siraw taga Kota, ki namarin sa so didyosen a dyos da a Nergal. Siraw taga Hamat, ki namarin sa so Asima. 
Siraw taga Abba, ki namarin sa so Nibhas kan Tartak. As siraw taga Separbaim, ki sinosohan da saw anak da do apoy a dāton da do dyos da sa a Adrammelek kan Anammelek. 
Inanyib da si ĀPO, ki nanongdo sa pa so yapo dyirad bōkod daw a nakayapwan a tawo tan magsīrbi sa papādi a mangidāton a para dyirad pagdaydayāwan saw do matohos saw a logar. 
Inanyib da si ĀPO, ki nagsīrbi sa pa do bōkod da sa a dyos a monot do dadakay daw no nasnasyon a yapo dyirad nakayapwan da saw. 
Manda sichangori, nāw da pa a pariparinen sīgodaw a dadakay da. Manganyib saba di ĀPO, kan monot saba dyirad pangkeddeng saw kan kapangokom saw mana siraw linlinteg saw mana bilbilin saw ni ĀPO a intoroh na dyirad kapotōtan saw ni Jakob a pinangaranan ni ĀPO so Israel. 
Do nakapachitōlagaw ni ĀPO dyirad Israelitaw, inbilin na dyira a kāna, “Magdaydāyaw kamo aba do matarek saw a dyos mana maydogod do salapen da, mana magsīrbi dyira mana mangidāton dyira. 
Ki si ĀPO a nangikaro dyinyo a minohtot do Egipto do panakabalin na kan kabīleg na, ki iyaw machita dayāwen nyo. Maydogod kamo dya, kan mangidāton siras dāton nyo so para dya lang. 
Machita nāw nyo a siaannad a tongpalen siraw pangeddengaw kan kapangokom saw, siraw linlinteg saw kan bilbilin saw a intolas na para dyinyo. Magdaydāyaw kamo aba do matarek saw a dyos. 
Kawayakan nyo abaw kapachitōlag ko dyinyo, kan magdaydāyaw kamo aba do matarek saw a dyos. 
Basbāli a dayāwen nyo ĀPO a Dyos nyo. Iyanchiw mangisalākan dyinyo a yapo do kakamay da no tabo kabōsor nyo.” 
Ki inadngey daba. Basbali a nāw da tinongtong sīgodaw a dadakay da. 
Aran nagdaydāyaw saw nyaya tawotawo di ĀPO, nagsīrbi sa pa dyirad didyosen da sa. Manda sichangori, tongtongen dan anak da saw kan ap-apoko da saw a parinen daw akmas aāmang da saw.