1 Ar-āri.
15.
Do chaasa poho naw kan wawaho a katawen no nakapagāri ni Jeroboam a pōtot ni Nebat do Israel, nayparin si Abidyam a āri do Joda. 
Nagāri do Jerosalem so tatdo a katawen. No ngaran ni ānang na, ki si Maakah a potōt a mabakes ni Abisalom. 
Tinōlad na tabo gatogatos saw a akmas pinarinaw ni āmang na. As oyod aba sipopōso kapodno na di ĀPO a Dyos na, akmaba di Dabid a kapoonan na. 
Ki aran komwan, maynamot do kāsi ni ĀPO a Dyos ni Dabid, intoroh na dyaw akmay paysohwan do Jerosalem. Pinarin no Dyos nya do nakapatnek naw so kapōtotan ni Dabid a natatādi a magāri tan payparinen naw Jerosalem a mapinsan. 
Ta pinarin ni Dabid kosto do kapanyideb ni ĀPO, kan somniwal aba a aran āngo inbilin na dya do ōnos no nakabyay na, malaksid do pinarin naw di Oryas a Heteo. 
Myan gobat da Abidyam kan Jeroboam do ōnos no kabyay ni Abidyam. 
No nya gobat, ki nairogi pa do chimpo ni āmang na a si Rehoboam, as natongtong do kapagāri ni Abidyam. Siraw kadwan saw a napariparin do nakapagāri ni Abidyam, kan tabo pinariparin na, ki naitolas sabawri do librowaw no pakasaritāan dan ar-āri no Joda? 
As nachipaynahah si Abidyam dyirad aāmang na saw, kan naitābon do syodad ni Dabid. As si Asa a pōtot na, ki nachitādi dya a āri. 
Do chadadwa naw a poho a katawen no kapagāri ni Jeroboam a āri no Israel, nayparin si Asa a āri no Joda, 
kan nagāri so apat a poho kan asa katawen do Jerosalem. No ngaran ni āpong na a mabakes, ki si Maakah a pōtot a mabakes ni Abisalom. 
Pinarin ni Asa kosto do kapanyideb ni ĀPO a akmas pinarin ni Dabid a kapoonan na. 
Pinaksyat na do tana siraw mahahakay kan mababakes a balangkantis a magsirsīrbi do pagdaydāyawan daw, kan pinakaro na saw tabo a didyosen a pinarin dan aāmang na. 
Pinakaro na pa si Maakah a āpong na do pwisto naw a reyna, ta namarin so makabābaba a posti para di Asera. Tinongeh ni Asa iyaw postyaya, kan sinosohan na do Payahosongan a Kidron. 
Ki pinakaro nabaw pagdaydāyawan saw. Aran komwan, sipopōso kapodno na di ĀPO do ōnos no kabyay na. 
Inyangay na sa do timplowaw ni ĀPO iyaw pirakaw kan balitok kan warawara saw a indidikar da kan āmang na. 
Myan gobat do payawan da Asa kan Baasa a āri no Israel do tabo kapagāri da. 
Nangraot si Baasa a āri no Israel so tawotawo no Joda, kan inahnyihnyi naw idi a Rama tan abo makahtot mana makasdep do sākop ni Asa a āri no Joda. 
Sinpangan na, inhap ni Āri Asa siraw tabo pirak kan balitok a nabidin do pangapyanaw do timplo ni ĀPO kan do bōkod naw a palasyo. Intalek na saw nya dyirad opisyalis na saw, kan tinoboy na sa a yangay da di Ben-hadad a āri no Aram a magtoray do Damasko. Si Ben-hadad, ki pōtot ni Tabrimmon a pōtot ni Hesyon. Binata ni Ben-hadad a kāna, 
“Myan pakono tōlag do payawan ta, yaken kan imo a akmas kayanaw no nakapagtōlag da āmang ko kan āmang mo. Chiban mo pa, tori ako a mangipaw-it dyimo so sāgot ko a pirak kan balitok. Changori, wayaken mo nakapachitōlag mwaw di Baasa a āri no Israel tan komaronchi do tana ko.” 
Nachion si Ben-hadad di Āri Asa, kan nanoboy siras komander saw kontodo bōyot da saw a mangraot siras idiidi saw do ammyānan a parti no Israel. Sinākop daw Ihon, Dan, Abel-bet-maakah, kan tabo Kinneret magrāman tabo a tana no Naptali. 
Do nakadāmag naw ni Baasa so nyaya, insardeng naw nangahnyihnyi so Rama, komnaro a somnonget do Tirsa. 
Sinpangan na, namarin si Āri Asa so pangeddeng do tabo tawotawo no Joda a abaw habas. Machita akoten kan ikaro da saw batwaw kan tarikāyowaw a yapo do Rama a inosar da Baasa. Inosar ni Āri Asa siraw nya a pinangahnyihnyi so idi a Geba do tana no Benhamin kan aran do idi pa a Mispa. 
Siraw tabo kadwan saw a napariparin do nakapagāri ni Asa, tabo napatayoka na saw, tabo pinariparin na, kan pinatnek na saw a syodad, ki naitolas sabawri do librowaw no pakasaritāan dan ar-āri saw do Joda? Do kamalkem naranaw ni Asa, kinorad saw kokod naw. 
Sinpangan na, nachipaynahah dyirad aāmang na saw, kan naitābon a nachirapa dyira do syodadaw ni Dabid. Si Jehosapat a pōtot na iyaw nachitādi dya a āri. 
Do chadadwa naw a katawen no kapagāri ni Asa a āri no Joda, nayparin si Nadab a pōtot ni Jeroboam a āri no Israel, kan nagāri so dadwa a katawen. 
Pinarin naw marahet do kapanyideb ni ĀPO. Inonotan naw dadakay ni āmang na. As maynamot do gatos na, pinawnot na saw tawotawo no Israel a naygatos. 
Si Baasa a pōtot ni Ahiha a yapo do trībo no Issakar, ki inpangta na si Nadab, kan diniman na iya do Gibbeton a idi dan Pilisteo. Nyaw naparin do kayan da Nadab kan tabo bōyot na saw a nanglakob so nawri a idi. 
On, diniman ni Baasa si Nadab do chatatdo naw a katawen a nagāri si Asa do Joda, kan si Baasaw nachitādi a nagāri do Israel. 
Kasdesdep pa ni Baasa a magāri, diniman naw tābo a kapamilya ni Jeroboam. Abaw aran asa tinokos na a sibibyay. On, diniman na sa tabo sigon do chirin ni ĀPO a inpaibahey na di Ahiha a pachirawatan na a taga Silo. 
Nyaw naparin maynamot do gatogatos a pinarin ni Jeroboam kan pinawnot na saw tawotawowaw a Israel a naygatos, as kan maynamot ta pinasoli na si ĀPO a Dyos no Israel. 
Siraw kadwan saw a napariparin do nakapagāri ni Nadab, kan tabo a pinaripinarin na, ki naitolas sabawri do librowaw no pakasaritāan dan ar-āri no Israel? 
Myan gobat do payawan da Asa kan Baasa a āri no Israel do ōnos no nakapagāri da. 
Do chatatdo naw a katawen ni Asa a āri no Joda, si Baasa a pōtot ni Ahiha, ki nayparin a āri do tabo a Israel, kan nagāri do Tirsa so dadwa poho kan apat a katawen. 
Pinarin naw marahet do kapanyideb ni ĀPO. Inonotan naw dadakay ni Jeroboam. As maynamot do gatos na, pinawnot na saw tawotawo no Israel a naygatos.