1 Ar-āri.
6.
Do nakatayokaw no 480 a katawen do nakahbot daw no Israelita yapo do Egipto, do chapat naw a katawen no nakapagāri ni Solomon do Israel, do bohan no Sib a no chadadwaw a bohan, inrogi naw napatnek so timplowaw ni ĀPO. 
Iyaw timplowaw a pinatnek ni Āri Solomon a para di ĀPO, ki 90 a kadapan so kanaro, 30 a kadapan so kawbong, kan 45 a kadapan so kakarang. 
Iyaw asdepan a yanan do salapenaw no karakohan a kwarto no timplo, ki 30 a kadapan so kanaro a machiyengay do kawbong no timplowaw. Nya kwarto, ki naypantad so 15 a kadapan a yapo do salapenaw no timplo. 
Napaparin so malolopit sa a bintan no timplowaw as maloplopit do gagan kan do irahem. 
Napapatnek pa so pinaynyopos na a pinadibon do gagan a dyindyin no karakohanaw a kwarto kan makatayrahemaw a kwarto no timplowaw, as tatdo a kasagonodan, kan nakwartokwarto a naypadibon. 
Iyaw makataybabaw a kasagonodan, ki papito kan godwa a kadapan so karahawa. Do mamanghobokaw a kasagonodan, ki sasyam a kadapan so karahawa. As do mamantohosaw a kasagonodan, ki asa poho kan godwa a kadapan so karahawa. Do maynyoposaw a gagan a dyindyin no timplowaw, napaparin so kama a mohtot do mismwaw a dyindyin tan abo mailabeng a wanan do dyindyinaw. 
Do nakapatnek daw so timplo, sira lang batwaw a natiktikan kan nakwadrado a yapo do paychadyan daw iyaw inosar da. Tan komwan, abo rongsoh mana wasay mana aran āngo a rimīnta a pasek iyaw madngey do timplowaw do kadama naw a mapatnek. 
Iyaw asdepan do makatayahbwaw a kasagonodan, ki mangket do abagātan no timplowaw. Myan ayran a komayat a mangay do mamanghobokaw a kasagonodan. Masaw a myan ayran a komayat do mamantohosaw a kasagonodan. 
Dawa, pinatnek naw timplowaw, kan pinatayoka na. Nasekegan kan nabobidaan so tappi a sidro. 
As pinatnek na pa saw kwartwaw do maynyoposaw do gagan a dyindyin no timplowaw. No kakarang no kāda asa, ki papito kan godwa a kadapan, kan nachitapang sa do timplowaw do sekeg na saw a sidro. 
Inpakatoneng ni ĀPO chirin naw di Solomon a kāna, 
“Maynamot do dya timplo a patpatneken mo, an onotan mo saw pangeddeng ko kan tongpalen mo saw kapangokom ko, as kapyahen mo saw bilbilin ko a anohdan mo, ipatongpal konchi dyimo karyaw a intoroh ko di Dabid a āmang mo. 
As machiyan akonchi dyirad Israelita, kan nonolay ko pa sabanchiw tawotawo ko a Israel.” 
As dawa, pinatnek ni Solomon timplowaw kan pinatayoka na. 
Pinakalopkopan naw irahem saw a dyindyin no timplo so tappi sa a sidro a nangrogi do rātag naw a manda do bobida. Iyaw rātag naw no timplo, ki pinakalopkopan na so tappi a saleng. 
Pinatarek naw mamansokelaw no timplo tan mamarin so makatayrahem a kwarto a iyaw Kasasantwanaw a Yanan. Tatdo a poho a kadapan so kanaro, kan pinakalopkopan na so tappi a sidro a yapo do rātag a manda do bobida. 
No karakohanaw a kwarto do salapen no nya mamansokel a kwarto, ki anem a poho a kadapan so kanaro. 
Iyaw irahemaw no timplo, ki nakalopkopan so tappi sa a sidro, as nakitikitan sa so sinan tabayay kan sinan sabsabong a nagbosak. Maynana sidro do irahem tan abo maboya a bato. 
Insagāna naw makatayrahemaw a kwarto do dichodan no irahem no timplo a dawriw pangayan na so lakāsanaw no tōlag ni ĀPO. 
No makatayrahemaw a kwarto, ki tatdo a poho a kadapan so kanaro, tatdo a poho a kadapan so kawbong, kan tatdo a poho a kadapan so kakarang. Pinakalopkopan naw irahem naw so pōro a balitok, as kan pinakalopkopan na paw altaraw so tappi a sidro. 
Pinakalopkopan na paw irahemaw no karakohanaw a kwarto so pōro a balitok. Napalodyit pa so kawar sa a balitok do salapenaw no makatayrahemaw a kwarto, as nakalopkopan irahem naw so balitok. 
On, pinakalopkopan naw intīrwaw a irahem no timplo so balitok. Pinakalopkopan na paw altaraw a myan do makatayrahemaw a kwarto so balitok. 
Namarin so maykasmang a sinan parswa a naypanyid a yapo do kayo a olibo a napangay do makatayrahemaw a kwarto. Kāda asa, ki asa poho kan dadima kadapan so kakarang. 
Iyaw kanaro no asaw a panyid no parswa, ki papito kan godwa a kadapan. Komwan iyaw asaw. An maybōlay, ki asa poho kan dadima kadapan yapo do tobwanaw no panyid na manda do tobwanaw no panyid na do bīt. 
Aran iyaw asaw a sinan parswa, ki asa poho kan dadima kadapan so rokod. Sira dadwa, ki pariho rokod da kan pōtar da. 
Iyaw kakarang no asaw a sinan parswa, ki asa poho kan dadima kadapan, as komwan do asaw. 
Pinangay na saw sinan parswaw a naypanyid do makatayrahemaw a kwarto do timplowaw. As siraw panyid da saw, ki naybōlay sa a maysinsalid do hobokaw no kwarto. As no maychamībitaw a panyid da, ki naymorong a nakasalid do maybītaw a dyindyin. 
As pinakalopkopan na saw dadwaw a sinan parswa a naypanyid so balitok. 
Pinaynyopos na a kinitikitan dyindyinaw no timplo so sinan parswa a naypanyid, sinan kayo no palma, kan sinan sabong a nagbosak do makatayrahemaw kan do karakohanaw a kwarto. 
Iyaw rātagaw no timplo, ki pinakalopkopan na pa so balitok do dadwaw a kwarto. 
Iyaw asdepanaw do makatayrehemaw a kwarto, namarin so maykasmang a aneb a yapo do kayo a olibo. Siraw mondora saw, ki dadima so sōli. 
As siraw dadwaw a aneb a naparin do kayo a olibo, ki kinitikītan na so sinan naypanyid saw a parswa, sinan kayo a palma, kan sinan sabong a nagbosak. Pinakalopkopan na sa so balitok. As dyirad sinan naypanyidaw a parswa kan sinan kayokayo a palma, ki napahapotan so napitpit a balitok. 
Masaw a namarin so mondora sa a kwadrado a yapo do kayo a olibo a para do asdepanaw do karakohanaw a kwarto, 
as kan dadwa aneb a yapo do kayo a saleng. Kāda asa, ki myan dadwa a bohong na a maytopid. 
Kinitikitan na sa so sinan naypanyid saw a parswa, sinan kayo a palma kan sinan sabong a nagbosak, as napahapotan so napitpit a malit a balitok. 
Pinatnek naw no makatayrahemaw a atat no timplo a inahadan na so taytotdo a kabatoy no bato a nakchid kan nakwadrado, as napakatayhapotan so tayisa kabatoy a toroso a sidro a wanan. 
Iyaw pondasyonaw no timplo ni ĀPO, ki napangay do bohan no Sib, do chapat naw a katawen no kapagāri ni Solomon. 
Do chaasa poho naw kan asa a katawen do bohan no Bol a no chawawaho naw a kabohan, ki natayoka danaw timplowaw a aran do kadedēkeyan a naibahey kan iksakto a tabo sigon do nakaiplāno naw. Papito a katawen na a napatnek sya.