1 Samwel.
28.
Do dāwri sa a araw, ki pinaychipeh da sa no Pilisteo saw bōyot da a machigobat do Israel. Binata ni Akis di Dabid a kāna, “Basta maawātan mo a imo kan siraw mahahakay a myan dyimo, ki machita a monot kamo do bōyot ko.” 
Tinbay ni Dabid a kāna, “Naon, as mapatakan monchi a mismo an āngo maparin no pachirawatan mwaya.” Binata met ni Akis a kāna, “Na maganay. Payparinen koymo a magnanayon a taga-bantay no inawan ko.” 
Nadiman dana do dāwri si Samwel. Tabo a Israel, dinongdong-awan da, kan intābon da do mismo na a idi a Rama. Ki do dāwri, pinaksyat sa ni Saulo tabo manolib saw kan ispiritista saw do Israel. 
Nakpeh saw Pilisteowaw, kan nagkampo sa do Sonem. Si Saulo, ki inakpeh na met tabo bōyot na a Israelita, kan nagkampo sa do Gilboa. 
Do nakaboya naw ni Saulo so bōyot no Pilisteo saw, ki namo kan naychinyābot. 
Nangyahes di ĀPO, ki tinbay naba ni ĀPO a aran do tayēnep mana do Orim mana dyirad propīta saw. 
Dawa, binata ni Saulo dyirad pachirawatan naw a kāna, “Paychichwas nyo pa yaken so mabakes a manolib tan mangay ako a manahes dya.” “Na, aryaw asa dwa Endor,” tinbay da. 
Dawa, si Saulo nagpamarang kan naylaylay so matarek, kan do kamahep nangay sa kan dadwa saw a mahahakay a rārayay na do mabakesaw. Binata na dya a kāna, “Machisisirin ka pa do ispirito a mangdaw para dyaken, as ipaiyangay mo dyaken tawowaw a ingaranan ko.” 
Ki inatbay no mabakesaw a kāna, “Sigorādo a chapatak mo an āngo pinarinaw ni Saulo. Pinaksyat na saw manolibaw kan ispiritista saw do dya tana. Āngo ta otapan mo byay ko a mangyangay dyaken do kadimanan ko?” 
Nagsapata si Saulo dya do ngaran ni ĀPO a kāna, “Ta akmas kasigorādo no kasibibyay ni ĀPO, madōsa kabanchi a maynamot do dyaya.” 
Inyahes no mabakesaw dya a kāna, “Sino iyangay ko a para dyimo?” “Yangay mo dyaken si Samwel,” tinbay na. 
Do nakaboyaw no mabakesaw si Samwel, nangagay so malyak. Binata na di Saulo a kāna, “Āngo ta inallīlaw mo yaken? Imwayas Saulo!” 
Inbahey no āryaw dya a kāna, “Mamo kaba. Āngo naboya mo?” Tinbay no mabakesaw a kāna, “Tori kwaya maboyaw ispirito a maybangon a yapo do tanaya.” 
“Āngo langa na?” minirwa na inyahes ni Saulo. Binata no mabakesaw a kāna, “Aryayaw malkem a īto a mayid so laylay.” Chinapatak ni Saulo a si Samwel, kan nagrōkob do tana a magdāyaw dya. 
Binata ni Samwel di Saulo a kāna, “Āngo ta riniribok mo yaken do kapaybangon mo dyaken?” Tinbay ni Saulo a kāna, “On ata, aryaw rakoh a riribok ko. Siraw Pilisteo saw, ki gobaten daw yaken, kan tinadyichokodan naranaya yaken no Dyos. Atbayen na pabaya yaken a aran yapo dyirad propīta saw mana yapo do tayēnep saw. Dawa, inpatawag koymo tan ibahey mo parinen ko.” 
Binata ni Samwel a kāna, “Āngo ta panahsan mo pa yaken do nakatadyichokod naranaya dyimo ni ĀPO, kan nayparin dana a kabōsor mo? 
Pinarin dana ni ĀPO akmas inpaibahey naw dyaken. Pinakaro narana ni ĀPO iyaw no pagāryan do tanoro mo, as kan nakaitoroh na sya do kaidyan mwaw a si Dabid. 
Maynamot ta pinarin mwabaw inbilinaw ni ĀPO mana inpatongpal mwabaw taywaraya a kasoli na dyirad Amalekita saw, nyaw pinarin ni ĀPO dyimo sicharaw. 
Nachirohno pa a iparawat nanchi ni ĀPO imo kan iyaw bōyot no Israel dyirad Pilisteo saw. As anchan delak imo kan siraw pōtot mo a mahahakay, ki myan kamonchi dyaken. On, iparawat nanchi ni ĀPO no tābo bōyot no Israel do tanoro dan Pilisteo saw.” 
Insigīda nalba si Saulo a nayyenenet do tanaw. Taywaraw nakamo na do inbahey saw ni Samwel. Apabaw ayit na, ta abaw kinan na a naychasaryan kan naychararakan. 
Nangay iyaw no mabakesaw di Saulo, as do nakaboya naw so taywara a nakamo na, binata na dya a kāna, “Chiban mo pa mo sir. Iyaw pachirawatan mwaya, ki tinongpal na imo. Inposta ko byay ko kan pinarin ko an āngo inbahey mo dyaken. 
Changori, adngeyen mo pa yaken a iyaw pachirawatan mwaya. Ipalōbos mo pa a torohan koymo so kanen mo tan makakan ka kan tan myan danaw ayit mo a mayam.” 
Chinaskeh ni Saulo, kan inbahey na a kāna, “Engga, koman akwaba!” Ki nachitaha saw rārayay na saw do mabakesaw a mangahwahok sya a koman, kan inadngey na sa. Naybangon do tanaw, kan naydisna do katri. 
Iyaw mabakesaw, ki myan napataba na a orbon a bāka do bahay na. Inalistwan na pinarti. Nanghap pa so arina, minasa na, as nakahoto na sya a abos yapo. 
Sinpangan na, indasar no mabakesaw da Saulo kan siraw mahahakay saw a rārayay na, kan komninan sa. Do dāwri met lang a ahep, ki nagrobwat sa kan nayam dana sa.