1 Samwel.
21.
Sinpangan na, nangay si Dabid di Ahimelek a pādi do idi a Nob. Naychamirpir si Ahimelek a nangbayat sya, kan inyahes na a kāna, “Āngo ta maychatanyi ka? Āngo ta abaw rārayay mo?” 
Ki tinbay ni Dabid si Ahimelek a pādi a kāna, “Inbilin naw dyaken ni āri iyaw panggep na, kan binata naw dyaken a kāna, ‘Ipalōbos mwabaw aran sino a makatoneng so panggep mo mana bilin ko dyimo.’ As siraw bonggoy kwaw a mahahakay, ki inbahey ko naw dyira an dino paybabayatan namen anchi. 
Changori, āngo myan dyimo daw? Maparin abawri a torohan mo yaken so aran dadima lang a tināpay, mana an āngo myanaw?” 
Initbay no pādyaw a kāna, “Na, abaw akmas gagāngayaw a tināpay ah. Ki aryaw tināpay a naidāton do Dyos. Maparin mo a hapen an dyi sa nachoknod dyirad mababakes soldādo mo saw so nakalo pa.” 
Inatbay ni Dabid pādyaw a kāna, “Syimpri mabaywan dyamen machoknod dyirad mababakes aran dino a angayan namen a komwan. Siraw osaren dan mahahakay, ki machita a madalos aran do sinsinan saw a ngayan namen. Dyori a mangamangay pas changori?” 
Dawa, tinorohan no pādyaw so tināpay a naidāton do Dyos, ta abaw tināpay daw malaksid do tināpayaw a inakas da do salapen ni ĀPO, kan tinādyan da so bayo inakas daw do dawri a araw. 
Do dāwri, asa dyirad tobotoboyen saw ni Saulo, ki nairana a myan daw a naybabalay a mangnanaya do salapen ni ĀPO. Iya, ki si Doeg a Edomita, iyaw pangōlwen dan magpaspastor na saw. 
Inyahes ni Dabid di Ahimelek a kāna, “Abawriw chibot mana ispāda mo dya? Naiyonot kwabaw ispāda kwaw mana aran āngo a armas ko, ta kinalokalo naw yaken no āryaw do bilin naw.” 
Tinbay no pādyaw a kāna, “Ari dyaw ispāda naw ni Golayat a iyaw Pilisteowaw a diniman mo do Payahosongan no Ela. Arya napongosan so lamit do dyichod naw no yananaw no epod. An chakey mo, ki hapen mo. Nawryaw lang myan a ispāda dya.” Binata ni Dabid a kāna, “Abaw akmas nawri ah! Itoroh mo pa dyaken.” 
Do dāwri a araw, pinayyayowan ni Dabid si Saulo, kan nangay di Akis a āri no Gat. 
Ki binata dan opisyalis saw ni Akis dya a kon da, “Iyabawri si Dabid, iyaw āri naw no bōkod na a tana? Iyabawriw ikankanta daw do katatāda da a kon da, “ ‘Si Saulo, ki nangdiman so rinibrībo. As si Dabid, ki dyira naw asa poho a rinibrībo’?” 
Iniktokto ni Dabid a maganay nya saya inchirichirin da, kan taywara a mamo an āngo iyaw parinen ni Āri Akis dya. 
Dawa, binalīwan ni Dabid iyaw katatawo na do salapen da. Do kayan naw dyira, naysin-aattit. Kinaradkad na saw asdepanaw no rowangan, kan nonolay naw ngahay naw a nachapot do minyin naw. 
Binata ni Akis dyirad opisyalis naw a kāna, “Chiban nyo paw nawrya tawo! Magattitaya! Āngo pangiyangayan nyo sya dyaken? 
Magkorkorang akoris magattit do dya, ta dawa iyangay nyo nya tawo dya a ipaboya naw kapagattit na do salapen ko? Samna, machita koriw nya tawo a somdep do bahay ko? Pī!”