Eksodo.
28.
Binata pa ni ĀPO di Moyses a kāna, “Tawagan mo si Aaron a ākang mo kan siraw pōtot na saw a mahahakay a sa Nadab, Abiho, Eleasar, kan Itamar, as patawahen mo sa dyirad Israelita saya tan magsīrbi sa dyaken a pādi. 
Mapaparin ka so masantwan sa a laylay para di Aaron a ākang mo tan manoroh dya so tan-ok kan dayāw. 
Ibahey mo dyirad tabo sanay saw a tawotawo a tinorohan ko so kasirīban a mayrayirayit a mangrayit sa siras laylay ni Aaron tan itatārek da iya a magsīrbi dyaken a pādi ko. 
Siraw nyaw laylay a parinen da: pangbarōkong, epod, kagay, maabel a laylay, tabahos a mayngaran so torban, kan barīkis. On, parinen da saw nya masantwan a laylay para di Aaron a ākang mo kan para dyirad pōtot na saw a mahahakay tan magsīrbi sa dyaken a pādi. 
Machita mangosar sa so mabondal a bolabola a matatarek so kīta balitok, asol, obi kan mabaya, as kan mapīno a tela.” 
“Mapaparin ka so epod a yapo do mabondal a bolabola a matatarek so kīta a balitok, asol, obi kan mabaya, as kan mapīno a tela. On, iyaw parinen naw no sanay. 
Myan dadwa a kapidāso a para pakoh a pachipongan dan maybītaw a payis no epod tan maytapang dadwaw a payis na. 
As iyaw nasanayaw so nakaabel a barīkis, ki mailānang do epodaw, as kan maparin pa do bolabola a balitok, mabondal a bolabola a matatarek so kīta a asol, obi kan mabaya, as kan mapīno a tela. 
“Mapahap ka so dadwa a mapapateg a bato a onyks, kan ipaikitikit mo daw ngarangaran dan asa poho kan dadwa a pōtot a mahahakay ni Israel. 
Mawnonot sa sigon do katotonnganaw a manda do boridek. Tayenem kāda bato. 
Akmas mangkitikitaw so alāhas, komwan kaikitikit siras ngarangaran daw no pōtotaw a mahahakay ni Israel do dadwa saya a bato. Ipaikolimas mo saw dadwaya bato dyirad pakaikolimasanaw a balitok. 
Mapaypong saw nyaya bato do pidāso saw a para pakoh no epod a pakanaknakman siras pōtot a mahahakay ni Israel. Si Aaron mayrara sira do maybītaw a pakoh na siras ngarangaran daya tan manakem na saw tawotawo ko kāda maypasngen dyaken a ĀPO. 
Mapaparin ka pa so dadwa pamadisnan so balitok, 
kan dadwa kawar a pōro a balitok. Mahobid saw nya kawar a akmay kordon, kan maigālot sa do pamadisnanaya.” 
“Mapaparin ka pa do sanay a mamarin so pangbarōkong a pangokom. Maparin a akmas no epodaw a maparin do mabondal a bolabola a matatarek so kīta a balitok, asol, obi kan mabaya, as kan mapīno a tela. 
Machita a kwadrado kan maytapid a dobli tan sasyam a kapolgāda so kananaro kan kawobong. 
Sinpangan na, maintar a maikolimas do apat a kalinya siraw mangingīna saw a bato. Iyaw dāmwaw a linya, ki siraw bato saw a sardyos, topasyo, kan garnet. 
Do somaronwaw a linya, ki siraw bato saw a esmeralda, sappiro, kan diamante. 
Do chatatdo naw a linya, ki siraw bato saw a hasinto, agate, kan ametista. 
As do chapat naw a linya, ki siraw bato saw a berilo, onyks, kan haspe. On, mapaypong sa do pamadisnanaw a balitok. 
Myan asa poho kan dadwa a bato. Do kāda asa bato, ki makitikitan so asa dyirad ngaran daw no pōtotaw a mahahakay ni Israel a pinakainawan dan asa poho kan dadwa a trībo. As siraw nya bato, ki akma say silyo. 
“Mapaparin ka pa so nahobid sa a makadina a akmay kordon a para pangbarōkong do pōro a balitok. 
Mapaparin ka pa so dadwa a balitok a sinan singsing, kan paypongen mo sa do dadwaw a sōli na no pangbarōkongaw. 
Mapaypong dadwaw a makadina a balitok do dadwaw a sinan singsing do maybītaw a soli no pangbarōkongaw. 
Iyaw maybītaw a tobwan no makadina, mapaypong do dadwaw a pakaikolimasan da, as kan maypaypong sa do maybītaw a pidāso a para pakoh do salapen naw no epod. 
Mapaparin ka pa so dadwa a balitok a sinan singsing, kan mapaypong sa do dadwaw a sōli no pangbarōkong do sayranaw, do makatayrahemaw a payis a mangket do epod. 
Mapaparin ka pa so dadwa a balitok a sinan singsing, kan mapaypong sa do maybītaw a ahbo no pidāso saw a pakoh do salapenaw no epod do sāip naw do anmwaw no barīkis a abelen no sanay. 
Siraw sinan singsingaw no pangbarōkong, ki maiyitan sa dyirad sinan singsing saw no epod do asol a kordon, tan machitapang do barīkisaw no epod a abelen no sanay, kan tan dya machiwitwitwit pangbarōkongaw do epod. 
“Kāda somdep si Aaron do Masantanaw a Yanan, rara nanchiw ngarangaran daw no pōtot saw a mahahakay ni Israel do anmo no pōso na do pangbarōkongaw a pangokom tan nāw na manakem kāda maypasngen di ĀPO. 
As do irahem naw no pangbarōkong a pangokom, mapangay kas Orim kan Tommim, as myan sa do masngen do pōso ni Aaron do kāda kasdep na do salapen ni ĀPO. Tan komwan, nāw ni Aaron a rarahen iyaw kapangeddeng para dyirad Israelitaw do pōso na do salapen ni ĀPO.” 
“Mapaparin ka pa so kagay no epod a maynana asol a tela. 
Maabotan hobok naw so pakakayanan no oho. Maabelan maynyopos naw no abot a akmas kwelyowaw tan dya mapirit. 
Do omdibon naw no sayran naw, maabelan so akmas asyaw no granada a yapo do mabondal a bolabola a matatarek so kīta a asol, obi kan mabaya. As mapababaetan sa so dedekey a komalinitin a pātit a balitok. 
Mabaebaet pātit saw kan granada a padibonen do sayranaw no kagay. 
Machita a paylaylay ni Aaron an madama a magsīrbi a pādi. No kalinitin dan pātit saw, ki madngey anchi anchan somdep do irahem no Masantanaw a Yanan do salapen ni APO kan anchan mohtot. On, machita na isōot tan dya madiman. 
“Mapapaytāpi ka so pōro a balitok a kaikitikitan no nya, ‘Masantwan para di ĀPO’ a akmas kapangikitikitaw do silyo. 
Itanan mo so asol a kordon kan paypongen mo do tabahosaw a mayngaran so torban. Iyaw nya napaytāpi, ki machita a myan do salapenaw no torban. 
Myan anchi do moyen ni Aaron, kan iyanchiw mayrara so aran āngo a gatos dan Israelita do kapangidāton daw so maibidang a masantwan. On, nāw na do moyen na tan marawat saw dāton daw do salapen ni ĀPO. 
“Mangpaabel ka so mapīno a tela a parinen a laylay, kan mapaparin ka so torban do mapīno a tela. Mapaparin ka pa so barīkis a mabordaan do rinayit no rayem. 
“As dyirad pōtotaw a mahahakay ni Aaron, mapaparin ka so laylay, barīkis, kan tabahos da tan manoroh dyira so tan-ok kan dāyaw. 
Machita a ipalaylay mo nya saya di Aaron a ākang mo kan dyirad pōtot na saw a myan dya. Tayokaw nya, padwan mo sa so lana no olībo do oho da, kan patneken mo sa a magpādi. Tan komwan, itatārek mo sa a magsīrbi dyaken a pādi. 
“Mapaparin ka pa so karsonsilyo da a yapo do tela a mangolib so kalābos da. Siraw nya karsonsilyo, ki yapo do katinghan a manda do pā. 
Machita a isōot da Aaron kan siraw pōtot naw a mahahakay an somdep sa do Toldaw a Pachibayabayatan di ĀPO, mana an maypasngen sa do altaraw a magsīrbi do Masantwanaw a Yanan tan dyi sa makagatos kan madiman. Nyaw manayon a pangeddeng di Aaron kan kapotōtan na saw a somarsarono dya.”