Eksodo.
25.
Binata ni ĀPO di Moyses a kāna, 
“Ibahey mo dyirad Israelita saya a magor-or sa so itoroh da dyaken. Rawaten mo or-or no kāda tawo sigon do sipopōswaw a manoroh. 
Siraw nyaw or-or a rawaten mo a yapo dyira: balitok, pirak, kan tombāga; 
mabondal a bolabola a matatarek so kīta a asol, obi kan mabaya, kan mapīno a tela; boboh no kalding; 
lālat no malloko a karniro a napanyibaya; lālat no lombalomba; kayo no akasya; 
lana no olibo a para dyirad paysohwan saw; bangbanglo a mailaok do lanaw a mangpasanto kan para do mabanglo a insinso, 
mapapateg saw a bato a onyks kan kadwan pa saw a masileng a bato a mapangay do laylayaw no matohosaw a pādi a mayngaran so epod kan do pangbarōkong naw. 
“As mapaparin ka dyira so masantwan a pagyanan a para dyaken tan machiyan ako dyira. 
On, parinen daw nya tabirnakolo kan tabo a rimīnta na a eksakto sigon do plastar a ipaboya konchi dyimo.” 
“Mapaparin ka so lakāsan a yapo do kayo a akasya. No kanaro na, ki tatdo a kadapan kan sasyam a kapolgāda, as dadwa a kadapan kan tatdo a kapolgāda so kawbong, kan dadwa a kadapan kan tatdo a kapolgāda so kakarang. 
Makalopkopan so pōro a balitok do irahem kan do hapot, as kan malebleban so dikorasyon a balitok. 
Mapachīpo ka so apat a sinan singsing a balitok, as maiparaot sa do apataw a kokod na. Bāli, dadwa a sinan singsing do maychamībit naw. 
Sinpangan na, mapaparin ka so iisiw sa a yapo do kayo a akasya, kan mapakalopkopan sa so balitok. 
Mapaōsok sa do sinan singsing saw do maychamībit naw no lakāsanaw tan pangisiwan. 
Machita a mabdibdis sabaw iisiw saya do nakaiyosōkan daya a maybīt. 
Sinpangan na, maposek do lakāsanaya iyaw dadwaw a matatāpi a bato a nakaitolasan dan bilbilin saw a itoroh konchi dyimo. 
“Mapaparin ka pa so tohong no pachipakawanan so gatos a pōro a balitok. As no kanaro na, ki tatdo a kadapan kan sasyam a kapolgāda, kan dadwa a kadapan kan tatdo a kapolgāda so kawbong. 
As mapaparin ka so dadwa a nachīpo a balitok a sinan parswa a naypanyid, as mapaybīt sa do maybītaw a tobwan no tohong naw. 
Bāli, maymorong sa a lānang do tohong naw. 
Siraw panyid daw, ki bolayen da a maypatohos tan abongan daw tohong naw. Paysalapan da a chiban tohong naw. 
Kolongen mo saw dadwaw a matatāpi a bato a itoroh konchi dyimo do lakāsanaw, as kaipatohong mo sya. 
Dawrinchi, do tohos no tohong no lakāsanaw, do payawan daw no dadwaw a parswa a myan do hapotaw no lakāsan, bayaten konchimo, kan itoroh konchi dyimo tabo bilbilin ko a para dyirad Israelita saya.” 
“Mapaparin ka pa so lamisaan a yapo do kayo a akasya. As no kanaro na, ki tatdo a kadapan, asa kan godwa a kadapan so kawbong, kan dadwa a kadapan kan tatdo a kapolgāda so kakarang. 
Mapakalopkopan so pōro a balitok, as kan malebleban so dikorasyon a balitok do maynyopos naw. 
Malebleban so tatdo a kapolgāda so kawbong a maynyopos, kan mabarikīsan so dikorasyon a balitok. 
Mapaparin ka so apat a sinan singsing a balitok a para do lamisaanaw, as maiparaot sa do apataw a sōli na do yananaw no kokod na. 
Siraw sinan singing saw, ki mapangay sa do masngenaw do lebleb naw a pachiosōkan iisiw saw. 
Mapaparin ka so iisiw a yapo do kayo a akasya, as mapakalopkopan sa so balitok, as kan nawrinchiw maosar a pangisiw so lamisaanaw. 
Mapaparin ka so tatakan sa kan bāso a yapo do pōro a balitok, as kan pronggo sa kan sabak sa a maosar anchi para do kapado so maidāton. 
Mapadatōkan lamisaanaya so tināpay a maidāton dyaken tan nāw na daw do salapen ko.” 
“Mapaparin ka pa so pamadatōkan so soho a yapo do machīpo a pōro a balitok. Mapaparin ka pa so lānang a disnan na, atngeh na, bāso na sa a akmay sabong, bōsel na sa, kan bosak na sa do pamadatōkanaw so soho. 
Anem a sanga na. Bāli, taytotdo do maybīt naw. 
Kāda asa do anemaw a sanga, ki myan tatdo a magsasarono a bāso na a mapōtar akmas sabongaw no almendras a myan sas bōsel kan bosak. 
Iyaw atngeh naw, ki myan magsasarono a apat a bāso a mapōtar akmas sabongaw no almendras a myan sas bōsel kan bosak. 
Myan asa bōsel do ibaba no kāda asa dyirad tatdwaw a kaparis a sangasanga na. 
Siraw bōselaw, sangasanga saw, kan pamadatōkanaw so soho, ki lānang sa a maparin do machīpo a pōro a balitok. 
“Sinpangan na, mapaparin ka pa so papito a soho, as kapangay mo sira do pamadatōkanaw so soho tan ranyagan daw salapenaw. 
Siraw panopit saw so pabīlo kan pangayan saw so oreb, ki machita maparin pa do pōro a balitok. 
Iyaw pamadatōkanaya so soho kontodo tabo a rimīnta na, ki machita a maparin do tatdo a poho kan dadima kakīlo a pōro a balitok. 
Chiban mo ipaparin mo saw a maganay sigon do plastaraw a naipaboya dyimo do dya tokon.”