Genesis.
41.
Sinpangan na, homnabas dadwa katawen. Do asa kahep, naytayēnep āryaw do Egipto. Do tayēnep naw, ki myan a maytēnek do payis no rakoh a oksong a mayngaran so Nile. 
Do dāwri, naboya na saw papitwaw a bāka a mawohas a minohtot a yapo do oksongaw, as nagar-arab sa so tametamek do payis naw daw. 
Somarono, myan saw matarek a papito a bāka a makokwan kan matataglang a minohtot a yapo do oksongaw. Naytēnek sa do payisaw no oksong a masngen do yanan dan nanōmaw a minohtot a kapayngay da bāka a mawohas. 
Sinpangan na, naychihat da hinamon no matataglang saw mawohas saw. Do dāwri, nayokay Paraonaw a maynamot do kakigtot na do naparinaw. 
Minirwa dana nakaycheh āryaw, ki myan danaw matarek a tayēnep na. Nakaboya danas papito a mararaboy a dāwa a mabibyas a yapo do asa atngeh. 
Somarono, tomnobo papitwaw a dāwa a mawpayang a hopes, as nahayo sa a maynamot do oltimo a kohat no salawsaw a nakayapo do dāya. 
Sinpangan na, naychihat a hinamon dan mawpayang saw a hopes a dāwa siraw mabibyas saw a dāwa. Do dāwri, nayokay danaw Paraon do nakakigtot na, kan natonngan na a tayēnep na sawen. 
Kamabekasanaw, mariribokan aktokto ni Paraon a maynamot do tayēnep na saw. Dawa, pinatawag na sa tabo magsalsalamangkaw kan tabo mamasīrib saw do Egipto. Inbahey na dyiraw tayēnep na saw, ki abaw aran asa dyira a makaibahey an āngo chakey a batahen no nawri. 
Do dāwri, binata no katatalkanaw a manorotoroh so palek di Paraon a kāna, “Pakawanen mo yaken, mo āpo āri, ta sichangori lang a nanakem ko gatos ko, kan machita ko a ipodno dyimo. 
Do nakapakasoli mwaw dyaken kan iyaw katatalkanaw a mamariparin so tināpay, ki inpabahod mo yamen do bahayaw no kapitanaw no gwardya. 
Do asa kahep, do kayan namenaw do dawri, ki myan tinayēnep namen a dadwa, ki naytarekaw chakey a batahen no tayēnep namen saw. 
Ki myan asa baro a Hebreo a adīpen no kapitanaw no gwardya, as kan rārayay namen do irahemaw no bahodan. Inbahey namenaw dyaw tayēnep namen saw, ki naibahey naw iyaw chakey da batahen no bōkod namenaw a tayēnep. 
Naparinaw a tabo akmas inbahey naw dyamen: Napaybidi ako do sīgodaw a toray ko, as kan naipalōdyit iyaw talken mwaw a mamariparin so tināpay.” 
Do nakadngey syay ni Paraon, pinatawag nas Jose. In-godes da pinahbot si Jose do bahodanaw. Do nakatayoka naw a napachischis kan napaiminyin, sinokatan da, as nakaiyangay da syad yananaw no āryaw. 
Do nakawaraw ni Jose do salapenaw no āryaw, binata ni Paraon di Jose a kāna, “Myan tinayēnep ko, ki aba polos makaibahey so chakey da batahen. Ki nadngey kwaw a makailawlawag ka so chakey a batahen no tayēnep a madngey mo. Dawa, pinatawag koymo.” 
Ki initbay ni Jose a kāna, “Āpo āri, makaibahey akwaba so chakey a batahen no tayēnep mo, an dya si Āpo Dyos lang manoroh so makahwahok dyimo.” 
Do dāwri, inlawlawag ni Paraon tayēnep naw di Jose a kāna, “Myan akwaw a maytēnek do payisaw no Oksong a Nile. 
Ki nakaboya kwaw so papito a bāka a mawohas a minohtot a yapo do oksongaw, as kan nagar-arab sa so tametamek do payis naw daw. 
Do dāwri, myan saw matarek a papito a bāka a somnarono a minohtot. Maychatagtaglang saw a taywara so kakokwan. Aryak pad nakaboya so komwan a kakwan bāka do intīrwaya a Egipto. 
Sinpangan na, naychihat da hinamon no matataglang saw siraw mawohas saw a kapayngay da bāka a nanōma a minohtot. 
Ki abaw pakaboyan so nakakan daw sira, ta nāw da a mabīchid a makwan. Katayoka na, nayokay ako. 
“Do kapirwa kwaw a nakaycheh, naytayēnep akos matarek. No naboya ko, ki papito a mararaboy a dāwa a mabibyas a yapo do asa katngeh. 
Somnarono, tomnobo papito a matarek a dāwa a mawpayang a hopes, as nahayo sa a maynamot do oltimo a kohat no salawsaw a nakayapo do dāya. 
Sinpangan na, naychihat a hinamon dan mawpayang saw a hopes a dāwa siraw mabibyas saw a dāwa. Inbahey ko naw nyaya dyirad magsalsalamangka saw, ki abaw makaibahey so chakey na batahen.” 
Do dāwri, binata ni Jose di Paraon a kāna, “Asaw chakey a batahen no tinayēnep mo saya. Inpakatoneng no Dyos dyimo iyaw makalo narana parinen. 
Papito a katawen iyaw chakey a batahen papito saw a mawohas a bāka kan iyaw papito saw a mabibyas a dāwa. Mayengay chakey a batahen no nya saya. 
As no papito saw a matataglang kan makokwan a bāka, as kan no papito saw a dāwa a mawpayang a hopes a nahayo a maynamot do makohat a salawsaw a yapo do dāya, ki papito a katawen a apteng chakey na batahen. 
“Akmas inbahey ko kaychi dyimo, mo āpo āri, ki inpakatoneng ni Āpo Dyos dyimo iyaw makalo narana parinen. 
No chakey na batahen nyaya, ki ītonchiw papito a katawen a āro maāpit do tābo a tana no Egipto. 
Katayoka na, monot anchiw papito a katawen a kapaychapteng. Ki mawayakan anchi no tawotawo papitwaw a katawen a kāro no āpit do Egipto, ta taywara anchi so karanggas kapaychaptengaya. 
Polos a manakem da pabanchin tawotawo papitwaw a katawen a kāro no āpit do kasaronwaw anchi no kapaychapteng, ta taywara anchi a makamwamomo. 
Iyaw nakapaypirwaw no tayēnep mo, ki chakey na batahen a oyod a inkeddeng no Dyos a maparin anchiw, kan abaw dwadwa a īto dana. 
“Dawa, sichangori, mo āpo āri, machita a maychichwas ka so asa tawo a myan so sīrib kan kapakaāwat a pinakainawan mo, ta iyaw payparinen mo a mangitoray so tābo a Egipto. 
As machita mamidi ka so kadwan saw a opisyalis a mangitoray dyirad mangakpeh saw so apagkalima no tabo maāpit do tābo a Egipto do papito saya tawen a kāro no maāpit. 
Ipakpeh mo dyiraw nawri a āpit do ītonchi a papitwa katawen a kāron āpit. As torohan mo sa pakono so toray a mangapya do agāmang saya do syodad saya, as kagwardya da sya. 
Siraw nyaw risīrba a mangbyay anchi so tawo anchan mangay papito a katawen a kapaychapteng do dya tana a Egipto. Ta an parinen mo komwan, madiman abaw tawo do kapteng.” 
Do dāwri, nakey si Paraon kan tabo saw opisyalis naw do inbaheyaw ni Jose. 
Binata ni Paraon dyirad opisyal na saw a kāna, “Aryoriw madongso ta a akmas Jose a myan so ispirito no Dyos?” 
Do dāwri, binata na di Jose a kāna, “Maynamot ta inpaboya tabo no Dyos dyimo nya saya, apabaw kapariho mo so kasīrib kan kapakaāwat. 
Dawa, payparinen koymo a pinakainawan ko a mangitoray so tābo a tana no Egipto, kan tongpalen anchi no tabo a tawotawo iyaw bilin mo. Abaw matwatohos so toray kan imo, an dya yaken a āri. 
On, itoroh ko dyimo sichangoriw toray a mangitoray so tābo pagāryan ko do Egipto.” 
Somnarono, pinakaro ni Paraon iyaw singsing naw a yanan pangilasīnan so toray na, as nakapasingsing na sya di Jose. Pinaylaylay na so mapīno a laylay no masisīta a tawo, as nakasaryo na pa sya so balitok. 
Do katayoka naw, pinasakay na si Jose do logan naw a pachigobat a osaren no makanawanaw a opisyal na tan maipaboya dyirad tawotawo katoray ni Jose. As myan saw soldādo a pinanmanma na kan si Jose do kapagparada da a mangingengēngey so, “Domichan kamo do rarahanaya, kan maydogod kamo, ta īto pinakainawan no āri!” Nyayaw naparin do kapayparin no āri si Jose a mangitoray do tābo a Egipto. 
Sinpangan na, binata ni Paraon di Jose a kāna, “Yaken Paraon do dya. Ki alit na, abanchiw mapalobōsan a parinen tawotawo do tābo a Egipto, an dyi mo a ipalōbos.” 
Do dāwri, pinangaranan na si Jose so Sapenat-panea, as inpakabahay na dya si Asenat a pōtot ni Potipera. Si Potipera, ki omyan do syodad no Heliopolis, kan iya, ki asa pādi daw a magdaydāyaw so araw. Do dāwri, komnaro si Jose do yanan āri, ta binidibidi naw kāda loglogar do tābo a Egipto. 
Do kaisiknan ni Jose a magsīrbi do Paraon do Egipto, nagtawen so tatdwa poho. Komnaro do palasyowaw, as nakabidibidi na do tābo a Egipto. 
Do kayanaw no papitwaw a katawen a maganay āpit, oyod a āro naāpit. 
Inpakpeh ni Jose iyaw inkeddeng naw a binglay no āpit, as inpakapya na dyirad syodad saw do papito a katawen do kārwaw no āpit do Egipto. Kāda syodad, ki myan nakpeh a āpit a yapo do omdibonaw a tana. 
Taywara kāro no irek a inpakapya ni Jose, kan akmas kārwaw no anay do kanayan. Dawa, sinōkat na paba, ta taywara danaw kāro na. 
Sakbay no kangay no kapaychapteng do Egipto, myan dadwa a pōtot ni Jose a mahahakay di baket na a si Asenat a pōtot ni Potipera a pādi do syodad no Heliopolis. 
Pinangaranan ni Jose iyaw matonengaw a pōtot na so Manasses, ta binata na a kāna, “Sinidongan yaken no Dyos a nangwayawayak so tabo karibok ko kan kangsah ko do pamilya ni āmang ko.” 
As pinangaranan naw no somaronwaw so Epraim, ta binata na a kāna, “Si Āpo Dyos pinayparin na yaken a maasi do tanaya nakalidyalidyatan ko.” 
Do nakapachipanda danaw no papitwaw a katawen a kāro no āpit do Egipto, 
somniknan danaw papitwaw a katawen a kapaychapteng a akma so inbaheyaw ni Jose. Siraw tawotawowaw do omdibonaw no Egipto, ki maychapteng dana sa. Ki do tābo a Egipto, ki myan kanen da. 
Dawa, do nakadidiw daw no tabo tawotawo so kapaychapteng do Egipto, ki nangay sa di Paraon daw a nachikakaāsi so kanen da. Ki inbahey ni Paraon dyirad tabo a taga Egipto a kāna, “Ngay, may kamo di Jose, as onotan nyo tabo ibahey na dyinyo ah!” 
Do nakapagwaras danaw no kapaychapteng do tābo a Egipto, nawri danaw nakaywang ni Jose so tabo saw a nakonokon a irek, as kailāko na sya dyirad taga Egipto saw maynamot ta taywara danaw kapaychapteng da. 
Aran siraw tawotawo saw a yapo do matatarek a tana, ki nangay sa do Egipto a gomnātang so kanen da di Jose, ta nagwaras danaw kapaychateng a aran do mateng saw a yanayanan.