भजनमैं.
139.
क्वे प्रिंब्मैंए चिबए ल्हागिर दाऊदए भजन घ्रि। ओ याहवेह, क्हिजी छेनाले ङए जाँच लइमुँ, धै ङ खैब मुँ बिसि क्हिजी सेइमुँ। 
ङ टिब नेरो राब क्हिजी सेइमुँ, ङए सैंर मैंबै ताँ क्हिजी ह्रेंगोउँइँलेन् क्होमुँ। 
ङ बैरु ह्‍यालेया धिंर रोलेया ङलाइ तो तइमुँ बिसि क्हिजी छेनाले सेम्, धै ङइ तो लइमुँ बिब क्हिजी ताँन् सेइमुँ। 
ओ याहवेह, ङए सुँइ तोइ ताँ पोंब् भन्दा ओंसोंन् ङइ तो बिल् म्हैइमुँ बिब क्हिजी छेनाले सेइमुँ। 
ङए लिलि ओंसों कारग्युले क्हि मुँ, धै रक्षा लबर क्हिजी ह्रोंसए यो ङए फिर थेंमिंइमुँ। 
क्हिए छाबै ज्ञान म्रोंसि ङ प्लेटोयाइमुँ, क्हिए ज्ञान क्होबर ङए ल्हागिर बेल्‍ले गारो मुँ। 
क्हिए प्ल्हउँइँले ङ खनिरै ह्‍याल् आखाँ! धै क्हिउँइँले ङ खनिरै भौदिल् आखाँ! 
ङ स्वर्गर ह्‍यालेन क्हि चर्न तमुँ! क्रोंर रोलेया क्हि चर्न तमुँ! 
त्हिंयाँ खबै क्ल्ह्‍योउँइँलेन् त्हिंयाँ लिबै क्ल्ह्‍यो समा प्हुरसि ह्‍यालेया 
चरै या क्हिए योजी ङ डोरेमिंब्मुँ, धै क्हिए क्योलो योजी ङ क्हाथेंब्मुँ। 
“मिछु खैबइ ङ हुवाब्मुँ, धै ङए कारग्यु चारबै ह्‍वे या मिछु तयाब्मुँ,” बिसि ङइ बिलेया 
च मिछु खैब क्हिए ल्हागिर म्हुँइँस छु तरिब् आरे। मिछु खैब क्हिए ल्हागिर चारबै ह्‍वे धोंबन् ग। छतसि त्हिंयाँर्बै मि म्रोंब् धोंले म्हुँइँस चारब्मुँ। 
क्हिजीन् ङए न्होंर्बै भागमैं बनेइ, क्हिजी आमाए फो न्होंर ङ केमिंइ। 
ङ औदिले छेन्ले बनेइमुँ, छतसि ङ क्हिए मिं थेब् लमुँ। क्हिए केमैं औदिबै मुँ बिब ङइ छेनाले सेइमुँ। 
आमाए फोर ङए ह्रिबमैं बनेसिन् मुँमा ङ खैले बनेब बिसि क्हिजी सेल् खाँल। झाइले ङ पृथ्बीए गैरुर बनेदै मुँमा, 
क्हिजी ङए आबनेबै ज्यु म्रोंइ। ङ कति सोल् योंम् बिसि ङ फिब् भन्दा ओंसोंन् क्हिए कितबर प्ह्रिथेंल। 
ओ परमेश्‍वर, ङए ल्हागिर क्हिए बिचारमैं सै ल्हें फेबै सैमैं भन्दा थेब मुँ! चमैं च्योसे च्योल् आखाँब मुँ! 
चमैं ङइ च्योल् त्हुस्याँ, च बालुवाए त्हुल् भन्दा ल्हें तमल। ङ छोरमा ङ क्हिने बालुन् तमुँ। 
ओ परमेश्‍वर, क्हिजी दुष्‍टमैं नास लवास्याँ कति छ्याँब तमल! ओ म्हि सैमैं, ङ ङाँइँले ह्रेंगो त‍याद्! 
च शत्‍तुरमैंइ क्हिए बिरोधर आछ्याँबै ताँ पोंम्, चमैंइ क्हिए मिं फाकर्न किंम्। 
ओ याहवेह, क्हिलाइ आखोब्मैं ङइ कत्ति आखो! छलेन क्हिए बिरोधर रेब्मैंलाइ ङइ आछ्याँबै मिइ ङ्ह्‍योम्! 
छाबै म्हिमैंलाइ ङ तिफुँइ आखो; ङइ चमैंलाइ शत्तुरमैं धोंन् ङ्हाँइमुँ। 
ओ परमेश्‍वर, ङ जाँचेदु, धै ङए खोंर्बै ताँमैं सेदु! ङ जाँचेदु, धै ङए न्हुँ कति ल्हें मुँ बिसि क्होमिंनु! 
आछ्याँबै घ्याँर प्रइमुँ उ बिसि ङ जाँचेदु, धै खोंयोंइ आखाँबै छ्ह योंबै घ्याँर ङ डोरेमिंनु।