भजनमैं.
136.
याहबेहलाइ धन्यबाद पिंन्, तलेबिस्याँ खी स्वाब मुँ। 
देवतामैं भन्दा थेबै परमेश्‍वरलाइ धन्यबाद पिंन्। 
प्रभुमैंए प्रभुलाइ धन्यबाद पिंन्। 
खीजी मत्‍त्रे औदिबै थेब-थेबै केमैं लम्। 
खीजी ह्रोंसए ज्ञान बुद्धिइ स्वर्ग बनेइ। 
खीजी क्युए फिर पृथ्बी थेंइ। 
खीजी त्हिंयाँ नेरो लयाँ बनेइ। 
त्हिंइए फिर क्ल्हे लबर खीजी त्हिंयाँ बनेइ। 
म्हुँइँसए फिर क्ल्‍हे लबर लयाँ नेरो मुसारा बनेइ। 
खीजी मिश्र ह्‍युलर्बै च्ह थेब ताँन् सैवाइ। 
खीजी इस्राएलीमैंलाइ मिश्र ह्‍युलउँइँले तेसि पखइ। 
खीए भोंबै यो नेरो पाखरइ चमैं तेसि पखइ। 
खीजी ओल्ग्या मा ङ्युँइ ङ्हिबाँ लवाइ। 
खीजी इस्राएलीमैंलाइ चए म्हाँजोउँइँले डोरेपइ। 
मिश्रर्बै म्रुँ फारो नरो चए सेनालाइ खीजी ओल्ग्या मा ङ्युँइर भ्योंवाइ। 
खीजी ह्रोंसए म्हिमैंलाइ क्यु आयोंबै क्‍ल्‍ह्‍योउँइँले डोरेपइ। 
खीजी थे-थेबै म्रुँमैं सैवाइ। 
कालिदिबै म्रुँमैं या खीजी सैवाइ। 
एमोरीमैंए म्रुँ सिहोनलाइ खीजी सैवाइ। 
बाशानर्बै म्रुँ ओगलाज्यै या खीजी सैवाइ। 
खीजी चमैंए ह्‍युल ह्रोंसए म्हिमैंलाइ क्ल्हे तल् पिंइ, 
खीजी ह्रोंसए के लबै इस्राएलीमैंलाइ च ह्‍युल पिंइ। 
ङि हार्दियामैं या खीजी ङिलाइ आम्‍ले। 
ङिए शत्तुरमैंउँइँले खीजी फ्रेमिंइ। 
सो प्ह्‍याबै तोन्दोंरि सैलाइ खीजी चबै सै पिंम्। 
स्वगर्बै परमेश्‍वरलाइ धन्यबाद पिंन्।