भजनमैं.
73.
आसापए भजन घ्रि। क्ह्रोंसेंन इस्राएलए ल्हागिर, छ्याँबै सैं प्ह्‍याब्मैंए ल्हागिर, परमेश्‍वर स्वाब मुँ। 
दिलेया ङए प्हले प्लेबर होंल, प्हले प्लेब् धोंले ङए बिश्‍वास म्हायाबि छेल, 
तलेबिस्याँ दुष्‍टमैं छ्याँब् तब् म्रोंसि च थेब् प्हैंब्मैंए फिर ङइ ह्रिस लमल। 
चमैं आसिन् समा दुःख तरिब् आरे; चमैं नब्-छब् आत, चमैंए ज्यु भोंब तम्। 
अरू म्हिमैंइ धोंले चमैंइ दुःख आयों; अरू म्हिमैंए फिर आछ्याँबै ताँमैं खब् धोंले चमैंए फिर आख। 
सिक्रि खिल् योंमा सैं तोंब् धोंले थेब् प्हैंमा चमैं सैं तोंम्; धै क्वें खिब् धोंले चमैंइ प्होंगि कैगि लम्। 
चमैंए सारो सैंउँइँले दुष्‍ट केमैं खम्; चमैंए सैंइ खोंयोंन् बिलै आछ्याँब ताँ मैंरिम्। 
चमैंइ आगुए बिल्‍लि लम्, झाइले दुष्‍ट ताँ पोंम्; धै ङम् ङन् ग बिसि अरूलाइ क्र ओलै आपिं। 
मु ङिलन् ग बिसि चमैंए सुँइ बिम्, धै चमैंए लेइ पृथ्बी तिगोंन् अधीन लम्। 
छतसि परमेश्‍वरए म्हिमैं चमैं ङाँइ एखम्, धै ल्हें क्यु थुँब् धोंले चमैंए ताँ क्वेंम्। 
“ङ्योइ लबै के परमेश्‍वरजी खैले सेमुँ? ताँन् भन्दा थेबै परमेश्‍वरने ज्ञान मुँ वा?” बिसि चमैंइ बिमुँ। 
दुष्‍टमैं छाब तम्: चमैं खोंयोंइ न्हुँ आल, चमैंए सै न्होर ल्हें तरिम्। 
क्ह्रोंसेंन ङइ तोनतोर्न ह्रोंसए सैं छ्याँब् प्ह्‍याइमुँ, धै गल्ति आलइमुँ बिसि ङइ यो ख्रुइमुँ। 
त्हिंतिमिन् ङइ दुःख योंइमुँ; धै न्हाँग ह्रोंसे ङइ दण्ड योंल् त्हुइमुँ। 
दिलेया दुष्‍टमैंइ पोंब् धोंले ङज्यै या पोंस्याँ क्हिए सन्तानलाइ ङइ दु:ख पिंमल। 
चु ताँमैं ङइ क्होल् म्हैमा ङए ल्हागिर बेल्‍ले गारो तइ। 
दिलेया लिउँइ ङ परमेश्‍वरए पबित्र क्‍ल्‍ह्‍योर होंमा खी ङाँर खसि मत्‍त्रे चमैंए लिउँइ तरिबै ताँमैं ङइ क्होइ। 
क्ह्रोंसेंन क्हिजी चमैंलाइ प्हले प्लेबै क्‍ल्‍ह्‍यो जरे थेंम्; क्हिजी चमैं नास तयाबर भ्योंवाँम्। 
थाइ आसेल्‍ले चमैं नास तयाम्, चमैं बेल्‍ले ङ्हिंमा ताँन् नोबोइ! 
न्हाँगर छोरमा म्होंड म्हयाब् धोंले, ओ प्रभु, क्हि छोरमा चमैंलाइ तो धोंइ आङ्हाँ। 
ङए सैंर दुःख तल, ङए सैं ककाँ क्युँ-क्युँ ङ्हाँल, 
छतसि ङ च्हैंब् मैंल् आखाँब नेरो ताँ क्होल् आखाँब् मुँल; क्हिए उँइँर ङ खेदो धोंन् तब् मुँल। 
दिलेया ङ खोंयोंन् बिलै क्हिने बालुन् मुँ; क्हिजी ङए क्योलो यो क्हामुँ। 
क्हिजी सल्‍ला पिंसि ङलाइ डोरेमिंम्, धै लिउँइ ङ क्हि ङाँर मान योंबै क्ल्ह्‍योर बोब्मुँ। 
ङए ल्हागिर स्वर्गर क्हि बाहेक अरू खाब् मुँ? धै पृथ्‍बीरै या क्हि बाहेक ङइ खोब खाबै आरे। 
ङए सैं नेरो ज्यु ङ्हिंन-ङ्हिंन् भों आरेलै खाँम्, दिलेया परमेश्‍वरजी ङए सैंर भों पिंम् धै खोंयोंन् बिलै ङ‍ए चैदिबै सै क्हिन् ग। 
क्हिउँइँले ह्रेंगो तब्मैं सियाब्मुँ; क्हिलाइ बिश्‍वास आलसि पिवाब्मैं क्हिजी नास लम्। 
दिलेया परमेश्‍वरने चेंदो तरिब ङए ल्हागिर छ्याँब ग, याहवेह परमेश्‍वरए प्हलेर्न ङ ग्वार योंबर खइमुँ। छतसि क्हिए ताँन् केमैंए बयन ङइ लब्मुँ।