भजनमैं.
70.
क्वे प्रिंब्मैंए चिबए ल्हागिर, याहवेहए मिंरि ख्रो पिंबै ल्हागिर दाऊदइ प्ह्रिबै भजन ओ परमेश्‍वर, ङलाइ युनन् जोगेमिंन्! ओ याहवेह, ङ ल्होबर युनन् युमिंन्! 
ङलाइ सैल् म्हैब्मैं अलमल् तसि फा फिन् तरिगे! ङए न्होह्रों तब् म्रोंसि सैं तोंब्मैं लिग्याँ तोसि न्हेयारिगे धै आगुइ चमैंलाइ म्हि आच्हिन् लवारिगे! 
ङलाइ प्ह्रब्मैं फा फिसि लि उँइँलै आखाँरिगे। 
दिलेया क्हिलाइ म्हैब्मैं ताँन् क्हिलाइन मैंसि सैं तोंरिगे धै छिं ङ्हाँरिगे! “क्हिजी जोगेमिंइ!” बिसि धन्यबाद पिंब्मैंइ खोंयोंइन् बिलै “परमेश्‍वर बेल्‍ले थेब मुँ!” बिसि बिरिगे! 
दिलेया ङ आयोब् नेरो आख्युब मुँ; ओ परमेश्‍वर, ङए ङाँर युनन् युमिंन्! क्हिजी ङलाइ ल्होसि ताँन् दुःखउँइँले फ्रेमिंम्। ओ याहवेह, युनन् युमिंन्!