भजनमैं.
23.
दाऊदए भजन घ्रि याहवेह ङए प्ह्रोंछैं ग, ङने तोइ खाँचो तरिब् आरे। 
खीजी ङ पिंग्या छि मुँबै क्‍ल्‍ह्‍योर टिल् पिंमुँ, क्यु पिसि हार-हार तब सल् लबै क्यु ङाँर खीजी ङलाइ डोरेसि बोम्। 
खीजी ङ धबै सोगों लमिंमुँ। ङइ खीए मिं थेब लरिगे बिसि खीजी ङ ठिक घ्याँर डोरेमिंम्। 
मिछु खैबै खोल्सर प्रल् त्हुलेया ङ तो सैने या ङ्हिंरिब् आरे, तलेबिस्याँ क्हि ङने बालु मुँ; क्हिए तुँबै प्हरे नेरो ह्‍वाबै प्हरेइ ङए रक्षा लम्। 
ङए शत्तुरमैंए उँइँर, क्हिजी ङए ल्हागिर चब् थुँब तयार लमिंमुँ। क्हिजी ङलाइ प्ह्रेंमैं धोंले मान लइमुँ, धै ङए प्हेल आप्लिंन् समा क्हिजी झोंरिम्। 
क्ह्रोंसेंन्ले क्हिए खोंयोंइ आनुबै म्हाँया नेरो आशिक ङए छ्ह तिगोंन् ङने प्रे तरिब्मुँ, धै ङ खोंयोंन् बिलै याहवेहए धिंर टिब्मुँ।