भजनमैं.
21.
क्वे प्रिंब्मैंए चिबए ल्हागिर दाऊदए भजन घ्रि। ओ याहवेह, क्हिजी शक्‍ति पिंबइले म्रुँ सैं तोंइमुँ। धै क्हिजी ट्होगों लमिंबइले खी बेल्‍ले सैं तोंसि उफर्दिइमुँ। 
क्हिजी म्रुँए सैंर मैंब् धों लमिंइमुँ, धै खीजी यो छ्युँ लसि ग्वार ह्रिमा क्हिजी थेमिंइमुँ। तिस्याँदे मैंन् 
छ्याँ-छ्याँबै सैमैं पुयुसि क्हि चने त्होबर युइ, धै छ्याँबै माराए मुकुट चए क्रर कुमिंइ। 
चइ क्हिने छ्ह ह्रिमा क्हिजी चलाइ खोंयोंइ आखाँबै छ्ह पिंइ। 
क्हिजी ट्होंगों लमिंबइले खीए मिं थेब तइमुँ, क्हिजी चए मिं थेब् लसि म्रुँमैंइ योंब् धों तबै मान पिंइमुँ। 
क्ह्रोंसेंन्ले क्हिजी चलाइ खोंयोंइ आखाँबै आशिक पिंइमुँ, धै क्हि चने तमिंबइले चए सैं खोंयोंन् बिलै तोंरिम्। 
तलेबिस्याँ म्रुँइ याहवेहए फिर भर थेंम्, ताँन् भन्दा थेबै परमेश्‍वरए खोंयोंइ आनुबै म्हाँया चए फिर मुँबइले च खोंयोंइ ङ्हिंल् त्हुरिब् आरे। 
क्हिए योजी ह्रोंसए ताँन् शत्तुरमैं म्हैसि पखब्मुँ, धै क्हिए शत्तुरमैं ताँन् क्हिए क्योलो योजी क्हाब्मुँ। 
क्हि युबै त्हेर क्हिजी चमैं लुँरिबै मिर भ्योंवाब्मुँ, याहवेहजी ह्रोंसए ह्रिसर चमैं क्ल्ह्‍योंवाब्मुँ, धै मिइ चमैं ख्रोंवाब्मुँ। 
क्हिजी पृथ्‍बीर चमैंए सन्तानमैं घ्रि या आचैल् लवाब्मुँ, धै चमैंए खलकमैं म्हिमैंए म्हाँजोउँइँले नास लवाब्मुँ। 
चमैंइ क्हिए बिरोधर आछ्याँबै ताँमैं मैंलेया, धै ङो चुसि क्हिए न्होह्रों लल् म्हैले या चमैंए सैंर मैंब् धों तरिब् आरे। 
क्हिजी त्हलेर मे थेंसि चमैं ल्हिमा चमैं लिग्याँ तोसि न्हेयाब्मुँ। 
ओ याहवेह, ह्रोंसए थेबै भोंर क्हि ताँन् भन्दा थेब् तद्! क्हिए भोंजी लबै थेबै केए क्वे प्रिंदै ङि क्हिए मिं क्वेब्मुँ।