JOB.
26.
Mi tana e sui nina goko a Bildad, me goko tugua a Job me tsaria, 
“!Eo, igoe nogo a Bildad, nimu goko o gini o sangadou sosongolia nomoa kesa aia e maluku lê me tau nogo susuliga! 
!Mo sauvania na goko sasaga vaga ia, mo pata koluginigotoa nimu donalevo kesa na tinoni bubulega vaga inau! 
?Masei o padâ igoe laka sauba ke rongomigira pipi nimu tsaqina goko? ?Masei e molovanigo igoe na papada ti o gini goko vaga ia? 
“Ma na tidaoqira igira ara mate ara gagariri tana matagu i laona na kô loki i vavana na barangengo. 
Ma na barangengo na mate e totu malemale lê moa vania God; me tau goto tsavua sa omea ke gini utugana vania God na morosiana. 
God nogo e taporatsania popono na masaoka, me tsauraginikaea na barangengo tana nauna e mangamanga lê. 
Ma God goto nogo e dangaliginigira na kô na parako, mara mamava me tongo vanigira kara botsa. 
Me molopoia na vula i murina na parako. 
Maia nogo e pedea tana ke ba vosa na tasi, na nauna i tana e tavota na marara tania na rodo. 
Mi kalina God e kore, migira na vungavunga sui ara viri kakasisi takuti tana matagu. 
Mi tana susuligana loki aia e beatasia na tasi, mi tana nina donalevo e tsogori pukaliginia na susuligana Rahab, aia na tuqana vigo na omea mamauri ni tasi. 
Ma na mamagona lê moa God e gini uviligigira na parako, me gini totu malemale na masaoka. Ma na limana e labuginia na tuqana vigo na omea mamauri ia, aia e tovoa na tsogoligi. 
Ma na omea vaga gira ara sauvulagi vanigita na turina lê moa gana susuliga God, e vaga moa ti nina gagasa lê moa igita a rongomia. ?Masei tangomana ke padagadovia e loki koegua manana nomoa gana susuliga God?”