Zaburi.
82.
Izaburi ya Hasafu. Rurema ye yimangiiri umuhumaanano gwa mwiꞌgulu, ye nali mu twa imaaja zeꞌbindi íbiri mu yikumbwa, ti: 
«Si muli mu kundirira banangora-mabi! Aaho! Mugakizi babulanira halinde mangoki? 
Mugirage mukizi bulanira ifuuvi, na banakahuku, kuguma naꞌbakeni na ábagoozirwi. 
Ee! Abakeni na ábatashobwiri babe bo mugaakiza, mu kubaguluula mu maboko ga banangora-mabi. 
«Mwe banangora-mabi, si ndaakyo muyiji, mutanali mu sobanukirwa. Ku kyanya indaliro zooshi zeꞌkihugo zigweti zigashaganibwa, muli mu kizi genda mugamamaata mu kihulu. 
Nꞌgadeta kwokuno: “Mweshi, mulyagagi bamungu! Ee! Muli baana ba Rurema úli hiꞌgulu lya byoshi.” 
Kundu kwokwo, mugaafwa nyene, ngaꞌbandi bandu booshi. Ee ma! Narufu amùgweti, kuguma naꞌbandi batwali booshi.» 
E Rurema, uyimukage, maashi! Ukizi twa imaaja za booshi ba mu kihugo. Si abandu baꞌmahanga gooshi bali beꞌmwawe!