Zaburi.
67.
Imwoꞌmwimangizi waꞌbimbi. Luli mu yimbwa neꞌnanga. Ulwimbo. 
E Rurema, ukizi tubonera ulukogo, unakizi tugashaanira. Amalanga gaawe gakizi tutanguulira. 
Kwokwo, lyeꞌnjira zaawe zigamenyeekana mu kihugo, halinde abandu baꞌmahanga gooshi banamenye ngiisi kwo ugweti ugakizi kiza. 
E Rurema, abandu beꞌmilala yoshi bakizi kuyivuga. Ukizi yivugwa mu bandu baꞌmahanga gooshi. 
Yabo booshi, bakizi kushagalukira, iri banayimba ku bushambaale. Mukuba, ubatwaziri ku njira yoꞌkuli, unali mu rongoora abandu booshi. 
E Rurema, abandu beꞌmilala yoshi bakizi kuyivuga. Ukizi yivugwa mu bandu baꞌmahanga gooshi. 
Kwokwo, lyeꞌkihugo kigayera, na Rurema anakizi tugashaanira. 
Ee! Agakizi tugashaanira, gira lyaꞌbandu booshi bakizi músimbaha, halinde heꞌkihugo kihekiiri.