Kawkanta.
8.
(Kanta ni Dabid) Pangino-on ya Pangino-on nawen, hay kapangyariyan mo ay ampipatnag ha kaganawan dogal ha babon lotà. Hay kagandawan mo ya ahè mapantayan ay nipatnag angga ha katatag-ayan. 
Hay mangayamò ya aw-anak boy kawkolaw ay ampipagkantan pamomori komo. Banà bayri, hika ay emen ha matibay ya dipinsa ya makapategen nin kawka-away mo. 
No ampaninglà ako ha langit ya ginawà mo ta angkakit koy bowan boy bawbito-en ya ingkolokar mo 
ay an-ihipen ko no anya ya tawo ta ampanemtemen mo boy ampa-alaga-an mo. 
Balè ginawà mo ya nin ma-aypà ha aw-anghil boy intag-ay mo ya nin pinarangalan nin emen ha arì. 
Kaganawan bagay ya ginawà mo ay inggawà mo ha hilong kapangyariyan na, 
bilang ha tawtopa, bawbakà, aw-ayop ya mangahilib, 
mawmanokmanok, kawkonà, boy kaganawan ma-in biyay ya anti ha dagat. 
Pangino-on ya Pangino-on nawen, hay kapangyariyan mo ay ampipatnag ha kaganawan dogal ha babon lotà.