Yaŋ.
32.
Damm nba ki Yennu nyik chab bi yanbɔmm, ki bia piin bi biit na, parpeenn tee bi yare. 
Daanɔ nba ki Yennu ki pak biirɔ nan u tun biir, ki bia ki mɔk kpinkpannii na, parpeenn tee u yare. 
Yoo nba ki n bo ki kat n yanbɔmm ki wann na, n gbanant bo baŋ ki chɔke, kimaan mɔnii nba ki n mɔ daa kur na paak. 
Yennu, a daar n tubir yonnu ni nan nyiɔk kur, ki n paŋ gbenn nan piar yonnu nba tuu koor tiŋ biaŋinba na. 
Ki n ji kat n yanbɔmm ki wanna, n ki bɔr n toonbiiti. N dukin ki kat n yanbɔmme ki tur fin Yennu, ki a nyik chabin. 
Li paak, wunba be fanu nana, wun miara, yoo nba ki u be mukir ni; wahala maŋ-i lekii pir nan nyunpana na ŋaan li kan teenɔ siar. 
Fine tee n gungurboor, ki a saa nyinnin wahala ni. N saa yin yaŋ nan kunkɔpaarir, a tinnu na paak, kimaan fine guun. 
Ki Yennu yet a, “N saa wanna faa sii be biaŋinba, ki sii kpaana ki goriia. 
A daa jatikit nan taamm koo boŋ nba ki mɔk yan, ki bi ŋmakitirɔ nan taanbobit nan taangarikawa, ki u fit saak mɔb na.” 
Nɔɔnbiit damm saa di fara, ŋaan binba teen Yennu yada na, u sii guub nan u lomm nba be yoo kur na. 
Yimm nba tee niŋamm na, yii mɔk parpeenn kii kpamm, kimaan Yennu nba tun linba ki turi na paak. Yimm nba saak u mɔb na, ii yikin nan parpeenn.