Yaŋ.
16.
Yennu, nyintin ninbɔŋ ni; n dindann be a nie ki jiin sommir po. 
N yet Yennu a, “Fine tee n Yomdaanɔ, bonŋana nba kur ki n mɔk, li nyii a boore.” 
Yennu niib nba teenɔ yada na, ŋamme be fanu. N parmaasir kur tee mii be bi boore. 
Binba tiin ki saa tingbana boor na baat nan mabire bi mɔŋ paak. N kan pukin bi maruŋ ni, n kan jiant bi tingbana maŋi. 
Yennu, n mɔk fin kuukɔɔe, fine teenin maa loon linba kur. N tɔɔnn po benu kur be a nuu nie. 
A piinii nba ki a pin kur mɔk bakitnauŋ; a piinii kur ŋane. 
N dont Yennu, kimaan u ŋmakitirin. Ki nyiɔk n dudukit teenin kpaanii. 
Yoo kur n tian Yennu benu po; u naakin, ki siar kaa ki saa daamimi. 
Li paak, n mɔk parpeenn ki teenɔ niipoouk, n mi nan n see chinchin, 
kimaan fine nyintin kuun paŋ ni; a kan te ki a kasii nirɔ gbanant n bat, koo wun nyint kpeentiŋi. 
A saa wannin sɔnu nba saa manfoor niŋa. A benu teenin kpinkpammuk bonchiann, ki baat nan parmann n boor yoo kur.