Zabur.
96.
Pa Hodáwandá nókén sawté bejanét. Oo sajjahén zemin! Hodáwandá benázén. 
Hodáwandá benázénét, áiay námá satá kanét. Har róch hamá nejátay járá bejanét ke cha áiay némagá ent. 
Kawmáni nyámá áiay shán o shawkatay járá bejanét, sajjahén kawmáni nyámá áiay ajabén káráni. 
Ke Hodáwand mazan ent o satáyáni láhek, cha sajjahén “hodáyán” bákamálter ent. 
Kawmáni sajjahén “hodá” náudagén bot ant, bale Hodáwandá ásmán jórh kortant. 
Ezzat o shán hamáiay chapp o chágerdá ent o kodrat o zébái áiay pákén bárgáhá. 
Oo kawmáni kabilahán! Hodáwandá benázénét, Hodáwanday shán o kodratá benázénét. 
Hodáwanday námay mazaniá benázénét, korbánig byárét o áiay bárgáhá byáét. 
Cha Hodáwanday pákiay zébáiá, áiay démá kóndhán bekapét. Oo sajjahén zemin! Áiay dargáhá belarz. 
Sajjahén kawmáni nyámá begwashét: “Hodáwand bádsháh ent.” Jahán pa mohkami jórh kanag butag o nasorit, á, kawmáni dadrasiá pa ensápa kant. 
Ásmán shádehi bekanát o zemin gal bát, daryá o harché ke daryáyá mán, pa borztawári áiá benázénátant. 
Dhagár o harché ke dhagárá hast gal bátant, jangalay sajjahén drachk pa shádmáni áiá benázénátant. 
Hodáwandá benázénátant, chiá ke á kayt, haw, pa zeminay dadrasiá kayt. Jahánay dadrasiá pa adl o ensápa kant o kawmáni dadrasiá wati rásti o tachkiay hesábá.