Zabur.
81.
Pa sázger o washáwázáni sálárá. “Gittitay” tarzay sará. Asápay Zabur. Hodáyá pa shádehi benázénét ke may zór o wák ent, pa Ákubay Hodáyá shádmániay kukkárá borz kanét. 
Sáz o tamburagá bongéj kanét, washtawárén chang o soródán. 
Máhay nóká, gwarándhay kánthay tawárá borz kanét, máhay chárdahá, may pákén aidá. 
É pa Esráilá hokmé, rahbandé cha Ákubay Hodáay némagá. 
Wahdé Mesray helápá dar átk kánuné pa Issopá eshti. Man eshkot, nááshnáén zobánéá gwasht: 
“Báron cha áiay kópagá dur kort o dast cha gránén saptá ázát kortant.” 
Taw sakkiáni sáhatán peryát kort o man tará rakként, man grandán andém atán o tará passaw dát, Meribáay ápáni kerrá tará chakkáseton. Ósht... 
Oo mani kawm! Beshkon ke tará dháha dayán, Oo Esráil! Drégatá taw mani habar gósh bedáshtén. 
Shomay nyámá darámadén hodáé mabát o bigánagén hodáéay démá sará jahl makanét. 
Man Hodáwand án, tai Hodá ke tará cha Mesrá dar kort o áwort. Wati dapá sarjamá pach kan, ke man porria kanán. 
“Bale kawmá mani habar gósh nadásht o Esráil mani parmánbardár nabut. 
Gorhá man á yalah dátant ke wati sengén deláni randgiriá bekanant, wati jenday ráh o hayáláni. 
Drégatá mani kawmá mani habar gósh bedáshtén o Esráil, mani ráhá beshotén. 
Á wahdá man damáná áyáni dozhmen prósh dátagatant o mani dast áyáni dozhmenáni helápá chest butagat. 
Hamá ke cha Hodáwandá naprata kanant, dotal o sarjahl butagatant, tán abad anchosh butagat. 
Bale tará gehterén gandomay warákon dátagat o tará cha talárá dar kortagén bénagá séron kortagat.”