Zabur.
66.
Pa sázger o washáwázáni sálárá. Sawté. Zaburé. Oo zeminay sajjahén mardomán! Pa Hodáyá shádehiay gwánká bejanét. 
Áiay námay mazaniá názénét o áiay shán o shawkatá satá kanét. 
Hodáyá begwashét: “Tai kár chenkadar bákamál ant. Tai wák o kodratay mazaniay sawabá dozhmen tai démá háká kapant. 
Zeminay sajjahén mardom tará sojdaha kanant o tará názénant. Haw! Tai námá sárháyant.” Ósht... 
Byáét o bechárét ke Hodáyá ché kortag, ajabén kár pa bani ádamá. 
Daryái hoshk kort o Hodáay kawm ódá pád payádaká cha kawrá gwast, áiay bárgáhá shádmáni bekanén. 
Á gón wati kodratá tán abad bádsháhia kant, chammi gón kawmán ent. Sarkesh áiay helápá pád mayáyant. Ósht... 
Oo kawmán! May Hodáyá satá kanét, pa borztawári benázénéti. 
May zendi rakkéntag o pádi cha thagalagá dáshtagant. 
Oo Hodá! Chiá ke taw márá chakkásetag, taw márá nograhay paymá palgártag. 
Taw márá dámá dawr dátag o may gardená mazanén báré eshtag. 
Cha tai razáyá mardomán márá sarjamiá lagatmál kortag, cha áp o ásá gwastagén, bale márá sarsabzén jáhéá áwortaget. 
Gón sóchagi korbánigán tai dargáhá káyán o gón taw wati kawlán puraha kanán, 
hamá kawl ke lonthán wádah dátag o dapá gwashtagant sakki o sóriáni wahdá. 
Pazzórén dalwatán sóchagi korbániga kanán, gón gwarándháni korbánigay duttán, pa taw pas o gók nadra kanán. Ósht... 
Oo sajjahén Hodátorsán! Byáét o beshkonét, hamá chizzána gwashán ke pa man kortaganti. 
Gón wati dapá áiay kerrá peryáton kortag, áiay satá o saná mani zobáná at. 
Agan badié mani delá butén Hodáwandá mani habar gósh nadáshtagat. 
Bale Hodáyá pa rásti eshkotag o mani dwáay tawári gósh dáshtag. 
Hodáyá satá bát ke cha mani dwáyá nádelgósh nabutag o wati mehri cha man dur nadáshtag.