Zabur.
65.
Pa sázger o washáwázáni sálárá. Dáuday Zabur. Sawté. Oo Hodá! Sahyuná satá o saná tai wadárá ent, gón taw may kawl puraha bant. 
Oo taw ke dwáyána eshkonay! Sajjahén mardom dém pa taw káyant. 
Á wahdá ke gonáh mani sará lombetant, taw márá bakshet. 
Bahtáwar hamá ent ke tawi gechéna kanay o wati bárgáhá káray tánke hamódá jahmenend bebit. Cha tai dargáhay nékiá séráp bátén, cha tai parasteshgáhay pákiá. 
Gón wati bákamálén kárán, márá pa adl o ensáp passawa dayay. Oo may rakkénókén Hodá! Zeminay chár kondh o durdastterén daryáyáni omét gón taw ent. 
Taw ay ke gón wati zór o wáká kóhet jórhéntagant o watá gón kodratá selahbandet kortag, 
daryáyáni gorraget árám kortant, mawjáni tawár o kawmáni áshóp. 
Zeminay chár kondhá nendók cha tai neshánián hayrán ant, taw shagreb o magrebá parmáay ke shádmániay kukkárá bekanant. 
Taw zeminay hayáldáriá kanay, áiá ápa dayay o ábáda kanay. Hodáay kawr sarréch ent taw mardomán gandoma bakshay chiá ke tai shawr hamé butag. 
Taw zeminay palán ápa dayay o dhagárá hamdasta kanay, gón gwáragá narmia kanay o rost o rodómá barkata dayay. 
Gón wati nékiá sálá tájé sará dayay, tai pádráh ham cha barkatá sarréch ant. 
Gyábánáni charágáh ábáda bant o kóhán wati srén pa shádmáni bastagant. 
Dhagárán watá gón ramagán póshéntag o daragán gón gandomá, shádmániay kukkárá borza kanant o sawta janant.