Zabur.
64.
Pa sázger o washáwázáni sálárá. Dáuday Zabur. Oo Hodá! Wahdé nálán o peryáta kanán, mani tawárá beshkon o zendá cha torsnákén dozhmenán berakkén. 
Maná cha badkáráni pandalán chér day, cha radkáráni áshópá. 
Chiá ke wati zobáná zahmáni paymá téza kanant o wati tahlén habarán tiray paymá kára bandant 
tánke cha wati sangarán bémayárá neshánag bekanant. Anágat o bé torsá áiá tira janant. 
Radén kárá yakdomiá delbaddhia dayant, habar ke kanant, maksadesh wati dámáni chér kanag ent. Gwashant: “Kayesha gendit?” 
Náensápiá dalil o honara kanant o gwashant: “Má tamán o kamálén shawré kortag.” Pa rásti ke ensánay del o hayál zánaga nabant. 
Bale Hodá áyán tira jant o anágat thappiga bant. 
Á wati jenday zobánay sawabá thagala warant. Harkas ke begenditesh pa áyán sará chandhénit. 
Sajjahén bani ádama torsant, Hodáay kárá jára janant o áiay kárá pa hósh o sára chárant. 
Pahrézkár Hodáwanday dargáhá shádehi kanát o áiay dargáhá panáh bezurát. Sajjahén nékdel pahr bekanátant.