Zabur.
36.
Pa sázger o washáwázáni sálárá. Hodáwanday hezmatkár Dáuday Zabur. Gonáh, badkárá mán áiay delay johlánkiá gwánka jant, áiay chammán Hodátorsi nést. 
Chiá ke á wati jenday delá haminchok wati tawsipá kant, ke wati gonáhá nazánt o cha áiá naprat korta nakant. 
Dapay habari badi o préb ent, cha aglmandi o nékkáriá dasti shoshtag. 
Tantaná wati gandal o bestará pandala sázit, gonahkáriay ráhi geptag o badiá yalaha nakant. 
Oo Hodáwand! Tai mehr arshá rasit o wapádári tán jambarán. 
Tai adl o rásti borzterén kóháni dhawlá ent o ensáp, mazanén johlánkiáni. Oo Hodáwand! Taw ay ke ensán o haywánay rakkénók ay. 
Oo Hodá! Tai mehr chenkadar porarzesh ent, bani ádam tai bánzoláni sáhegá panáha gipt. 
Á cha tai bárgáhay sarréchén nyámatán séra bant o cha wati lezzatáni kawrá áyán sérápa kanay. 
Chiá ke zendmánay sarchammag taw ay o cha tai nurá ent ke nura gendén. 
Pa wati dóstdárán wati mehrá modám barjáh dár o adl o rástiá pa nékdelán. 
Porkebráni pád mani sará ér mabát, badkáráni dast maná sargardán makanát. 
Bechár badkár che paymá kaptagant, háká sarshakun o pád átka nakanant.