Zabur.
8.
Pa sázger o washáwázáni sálárá. “Gittitay” tarzay sará. Dáuday Zabur. Oo Hodáwand, may Hodáwand! Chenkadar porshawkat ent tai nám jahánay chárén kondhán. Taw wati shán o mazani ásmánáni sarborá sheng o tálán kortag. 
Pa wat satá o saná, chokk o shirmechén nonnokáni dapá ham dátag ke tai dozhmenáni sawabá tará satá bekanant, tánke dozhmen o bérgirán chopp o bétawár bekanay. 
Wahdé tai ásmánáni némagá chárán ke tai lankokáni ezm o honar ant máh o estáráni némagá, ke taw barjáh dáshtagant, 
ensán chié ke taw áiay gamwár bebay o bani ádam kay ent ke áiay delgóshá bedáray? 
Bale angat taw cha préshtagán bass kammoké kamter kort o mazani o ezzatay táj sará dát. 
Wati dastay sajjahén káráni sará hákem kort o har chizz áiay pádáni chérá esht. 
Sajjahén ramag o górrom gyábán o sahrái jánwar 
ásmánay báli morg o daryáay máhig o har ché ke cha zeray ráhá gwazit. 
Oo Hodáwand, may Hodáwand! Chenkadar porshawkat ent tai nám jahánay chárén kondhán.