أَعْمَالْ.
20.
بَعْدْمَا وْفَاتْ الخُوضَة، عَيِّطْ بُولِسْ لِلتْلَامْذَة وشَجِّعْهُمْ، ومْبَعِّدْ وَدَّعْهُمْ وسَافِرْ لْمَقْدُونْيَا. 
وقْعَدْ يْدُورْ فِيهَا ويْشَجَّعْ بَرْشَة فِي المُؤْمْنِينْ فِي كُلْ بْلَاصَة. ومْبَعِّدْ وْصُلْ لِليُونَانْ، 
وقْعَدْ فِيهَا ثْلَاثَة شْهُرْ. وَقْتِلِّي كَانْ يْحَضِّرْ فِي رُوحُو بَاشْ يْسَافِرْ لْسُورْيَة عْلَى طْرِيقْ البْحَرْ، كَانُوا اليْهُودْ يْخَطِطُوا بَاشْ يُقْتْلُوهْ، يَاخِي قَرِّرْ بَاشْ يِرْجَعْ عْلَى طْرِيقْ مَقْدُونِيَّة. 
وسَافِرْ مْعَاهْ سُوبَاتْرُسْ وِلْدْ بِرُّسْ مِنْ بِيرِيَّة، وأَرِسْتَرْخُسْ وسَكُونْدُسْ مِنْ تْسَالُونِيكِي، وغَايُوسْ وتِيمُوثَاوُسْ مِنْ مْدِينِةْ دَرْبَة، وتِيخِيكُسْ وتُرُوفِيمُسْ مِنْ آسِيَّا. 
هَاذُومَا سِبْقُونَا وقَعْدُوا يِسْتَنَّاوْ فِينَا فِي تَرُوَاسْ. 
آمَا أَحْنَا سَافِرْنَا عْلَى طْرِيقْ البْحَرْ مِنْ فِيلِپِّي بَعْدْ عِيدْ الفْطِيرْ، وبَعْدْ خَمْسَة أَيَّامْ خْلَطْنَا عْلِيهُمْ لْتَرُوَاسْ، وقْعَدْنَا غَادِي سَبْعَة أَيَّامْ. 
ونْهَارْ الأَحَدْ، كُنَّا مَلْمُومِينْ بَاشْ نِقْسْمُوا الخُبْزْ ونَاكْلُوا. بْدَا بُولِسْ يُوعِظْ فِي الحَاضْرِينْ، وطَوِّلْ فِي الكْلَامْ حَتَّى لْنُصْفْ اللِّيلْ عْلَى خَاطْرُو كَانْ نَاوِي يْسَافِرْ مِنْ غُدْوَة. 
والبِيتْ الِّي تْلَمِّينَا فِيهَا فِي الطَّاقْ الفُوقَانِي كَانْ فِيهَا بَرْشَة فْنَارَاتْ. 
وكَانْ فَمَّة وْلِدْ إِسْمُو أَفْتِيخُوسْ قَاعِدْ عْلَى حَرْفْ الشِّبَّاكْ. كِي بُولِسْ طَوِّلْ فِي الكْلَامْ، غِلْبُو النُّومْ يَاخِي طَاحْ مِالطَّاقْ الثَّالِثْ، وهَزُّوهْ مِيِّتْ. 
يَاخِي هْبَطْ بُولِسْ وطَبِّسْ عْلِيهْ وعَنْقُو وقَالْ: «مَا تْخَافُوشْ! رَاهُو حَيْ». 
وبَعْدْهَا طْلَعْ لِلطَّاقْ الفُوقَانِي، وقْسِمْ الخُبْزْ وكْلَا، وبْقَى يِتْكَلِّمْ حَتَّى لِلفَجْرْ، ومْبَعِّدْ مْشَى. 
ورَوْحُوا بِالوْلِدْ حَيْ، وهَاذَا شَجَّعْهُمْ بَرْشَة. 
آمَا أَحْنَا سْبِقْنَا بُولِسْ ورْكِبْنَا فِي سْفِينَةْ لْأَسُّوسْ، واسْتَنِّينَاهْ بَاشْ يْجِي يِرْكِبْ مْعَانَا مِنْ غَادِي، عْلَى خَاطْرُو حَبْ يِمْشِي لْأَسُّوسْ عْلَى سَاقِيهْ. 
وَقْتِلِّي خْلَطْ عْلِينَا، طَلَّعْنَاهْ مْعَانَا فِي السْفِينَة ومْشِينَا لِمْدِينِةْ مِيتِيلِينِي. 
ومِنْ غُدْوَة كَمِّلْنَا السْفَرْ ووْصُلْنَا قُدَّامْ جَزِيرِةْ خِيُوسْ. وفِي النْهَارْ الثَّالِثْ تْعَدِّينَا بِجْنَبْ جَزِيرِةْ سَامُوسْ. ووْصُلْنَا لْمْدِينِةْ مِيلِيتُسْ فِي النْهَارْ الرَّابَعْ. 
وكَانْ بُولِسْ مْقَرِّرْ إِنُّو مَا يَاقِفْشْ فِي أَفَسُسْ بَاشْ مَا يْضَيَّعْشْ الوَقْتْ فِي آسِيَّا، فَمَّاشْ مَا يَخْلِطْ عْلَى عِيدْ يُومْ الخَمْسِينْ فِي أُورْشَلِيمْ. 
ومِنْ مِيلِيتُسْ، بْعَثْ بُولِسْ يِسْتَدْعَى فِي شْيُوخْ كْنِيسِةْ أَفَسُسْ. 
وكِي وُصْلُوا قَالِلْهُمْ: «إِنْتُومَا تَعْرْفُوا كِيفَاشْ كُنْتْ نِتْصَرِّفْ مْعَاكُمْ طُولْ الوَقْتْ الِّي عَدِّيتُو بِينَاتْكُمْ، مِالنْهَارْ الأُوِّلْ الِّي عْفَسْتْ فِيهْ آسِيَّا. 
وكُنْتْ نِخْدِمْ فِي الرَّبْ بْكُلْ تَوَاضُعْ وبَرْشَة دْمُوعْ، ونْقَاسِي فِي المْحَايِنْ فِي جُرِّتْ مُؤَامْرَاتْ اليْهُودْ. 
ومَا قَصِّرْتِشْ فِي حَتَّى حَاجَة تْفِيدْكُمْ. بِالعَكْسْ، كُنْتْ نْشَجَّعْ فِيكُمْ ونْعَلِّمْ فِيكُمْ قُدَّامْ النَّاسْ ومِنْ دَارْ لْدَارْ. 
وكُنْتْ نْشَجَّعْ فِي اليْهُودْ ولِّي مُشْ يْهُودْ بَاشْ يْتُوبُوا ويِرْجْعُوا لِلَّهْ، ويَمْنُوا بْرَبْنَا يَسُوعْ. 
وآنَا تَوَّا بِشْ نْطِيعْ الرُّوحْ القُدُسْ ونِمْشِي لْأُورْشَلِيمْ، ومَا نَعْرِفْشْ شْنُوَّة الِّي يِسْتَنَّى فِيَّا غَادِي. 
آمَا فِي كُلْ مْدِينَة نِمْشِيلْهَا، الرُّوحْ القُدُسْ يْقُلِّي إِنُّو الحَبْسْ والمَشَاكِلْ يِسْتَنَّاوْ فِيَّا غَادِي. 
آنَا حْيَاتِي مَا تْهِمْنِيشْ، الِّي يْهِمْنِّي هُوَّ إِنِّي نْقُومْ بْمُهِمْتِي ونْكَمِّلْ الخِدْمَة الِّي كَلَّفْنِي بِيهَا الرَّبْ يَسُوعْ، وهِيَّ إِنِّي نْخَبِّرْ بِبْشَارِة نِعْمِةْ اللَّهْ. 
وآنَا نَعْرِفْ إِنْكُمْ إِنْتُومَا الِّي كُنْتْ فِي وِسْطْكُمْ نْبَشِّرْ بْمَمْلِكْةْ اللَّهْ مَا عَادِشْ بِشْ تْشُوفُوا وِجْهِي مَرَّة أُخْرَى. 
هَاذَاكَا عْلَاشْ نْقُلْكُمْ اليُومْ بِلِّي آنَا بَرِيءْ مِنْ دَمْكُمْ، كَانْ وَاحِدْ مِنْكُمْ مَا يِنْجَاشْ، 
عْلَى خَاطِرْنِي مَا خَبِّيتْ عْلِيكُمْ شَيْ مِنْ خُطِّةْ اللَّهْ. 
مَالَا رُدُّوا بَالْكُمْ عْلَى رْوَاحْكُمْ وعْلَى شَعْبْ اللَّهْ الكُلْ الِّي حَطْكُمْ الرُّوحْ القُدُسْ مَسْؤُولِينْ عْلِيهْ، بَاشْ تِتْلْهَاوْ بِكْنِيسِةْ اللَّهْ الِّي شْرَاهَا بْدَمُّو. 
«وآنَا نَعْرِفْ الِّي بَعْدْمَا نِمْشِي بِشْ يُدْخْلُوا بِينَاتْكُمْ نَاسْ كِالذْيُوبَة المِتْوَحْشَة ومُشْ بِشْ يِرْفْقُوا بْشَعْبْ اللَّهْ. 
ويُخْرْجُوا مِنْكُمْ نَاسْ يْبَدْلُوا الحَقْ فِي تَعْلِيمْهُمْ بَاشْ يْجُرُّوا التْلَامْذَة وْرَاهُمْ. 
مَالَا رُدُّوا بَالْكُمْ، وتْذَكْرُوا كِيفَاشْ قْعَدْتْ ثْلَاثَة سْنِينْ وآنَا انَّبَّهْ فِي كُلْ وَاحِدْ فِيكُمْ نْهَارْ ولِيلْ وآنَا نِبْكِي بِالدْمُوعْ. 
«وتَوَّا نْخَلِّيكُمْ فِي وْدِيعِةْ رَبِّي، وكِلْمِةْ نِعْمْتُو القَادْرَة بَاشْ تِبْنِيكُمْ وتُضِمْنِلْكُمْ مِيرَاثْ مْعَ قِدِّيسِينْ اللَّهْ الكُلْ. 
آنَا عُمْرِي مَا اشْتْهِيتْ لَا فُضَّة ولَا ذْهَبْ ولَا لِبْسَة حَدْ. 
وإِنْتُومَا تَعْرْفُوا الِّي آنَا خْدِمْتْ بِيدَيَّا هَاذُمْ بَاشْ نُصْرُفْ عْلَى رُوحِي وعَالنَّاسْ الِّي مْعَايَا. 
ووَرِّيتْكُمْ كِيفَاشْ يِلْزِمْنَا نِخْدْمُوا ونِتْعْبُوا بَاشْ نْعَاوْنُوا المِحْتَاجِينْ. اتْفَكْرُوا كْلَامْ الرَّبْ يَسُوعْ وَقْتِلِّي قَالْ: "الِّي يَعْطِي يِتْبَارِكْ أَكْثِرْ مِلِّي يَاخُذْ"». 
وبَعْدْمَا قَالْ الكْلَامْ هَاذَا، رْكَعْ مْعَاهُمْ الكُلْ وصَلَّى. 
واطَّرْشْقُوا الكُلْ بِالبْكَاء، وتِرْمَاوْ عْلَى بُولِسْ يْعَنْقُوا ويْبُوسُوا فِيهْ. 
وأَكْثِرْ حَاجَة حَزْنِتْهُمْ كِي قَالِلْهُمْ الِّي مَا عَادِشْ بِشْ يْشُوفُوهْ مَرَّة أُخْرَى. ومْبَعِّدْ شَيْعُوهْ لِلسْفِينَة.