SAUMU.
136.
“Kure mase,” kahtoko Kuesẽkomo a, kure aexiryke; kypyno xine exikehpyra mana. 
“Kure mase,” kahtoko Ritonõpo Imehxo Exikety a; kypyno xine exikehpyra mana. 
“Kure mase,” kahtoko tuisamehxo Exikety a; kypyno xine exikehpyra mana. 
Ritonõpo rokẽ osenuruhkatoh Rihpõme mana; kypyno xine exikehpyra mana. 
Tuaro toehtoh ke kapu Rihpõme mana; kypyno xine exikehpyra mana. 
Sero nono tyrise eya tuna zueme aexityã po; kypyno xine exikehpyra mana. 
Xixi tyrise eya, nuno roropa; kypyno xine exikehpyra mana. 
Saeremehxo xixi ehtohme saereme ahtao; kypyno xine exikehpyra mana. 
Nuno te, xirikuato tõ maro ezurume ehtohme koko; kypyno xine exikehpyra mana. 
Ejitu poenõ apitoryme aenurutyã totapase eya; kypyno xine exikehpyra mana. 
Ejitu poe Izyraeu tõ tarose eya; kypyno xine exikehpyra mana. 
Tarose toto tomary jamihmã ke, tapory jamitunuru ke roropa; kypyno xine exikehpyra mana. 
Tuna konõto Tahpiremã tapiakase eya irãnaka; kypyno xine exikehpyra mana. 
Irãnakuroko typoetory tõ tarose eya; kypyno xine exikehpyra mana. 
Yrome Ejitu tuisary tynerymapose eya isoutatu tõ maro; kypyno xine exikehpyra mana. 
Ona tonorẽ poro Izyraeu tõ tarose eya; kypyno xine exikehpyra mana. 
Imehnõ nonory esẽkõ jamihmãkõ totapase eya; kypyno xine exikehpyra mana. 
Tuisa tõ imehxo exiketõ totapase eya; kypyno xine exikehpyra mana. 
Seõ, amoreu tõ tuisary totapase eya; kypyno xine exikehpyra mana. 
Oke, Pasã tõ tuisary roropa totapase eya; kypyno xine exikehpyra mana. 
Typoetory tomo a mokaro nonohpyry tokarose eya; kypyno xine exikehpyra mana. 
Typoetory Izyraeu nonoryme ehtohme moro tokarose eya; kypyno xine exikehpyra mana. 
Wenikehpyra kynexine ynororo kypoko xine typoremãkase kuahtao xine; kypyno xine exikehpyra mana. 
Kymarokõ tymyhpokase eya kyzehnotokõ wino; kypyno xine exikehpyra mana. 
Isene exiketomo a tonahsẽ ekaroneme mana, porehme; kypyno xine exikehpyra mana. 
“Kure mase,” kahtoko Ritonõpo kapu Esemy a; kypyno xine exikehpyra mana.