SAUMU.
87.
Kora tõ nymerohpyry. Ypy kurã po typatary tyrise Ritonõpo a; imehnõ pata tõ motye Izyraeu tõ nonory po, pata Jerusarẽ sehxo mana. 
Etako pahne, Ritonõpo patary, aotururu kurã Jerusarẽ poko: 
“Ahno esehtoryhtao ya jomiry omipona exiketõme, Ejitu esehtõko ase, Papironia roropa; Pirixitea põkomo, Tiro põkõ maro, Etiopia põkõ roropa: mokaro rĩko ase Jerusarẽ po aenurutyã samo.” 
Pata Jerusarẽ poko ynara ãko mã toto: ahno tõ emero rokẽ nonory poe moro pata po osesarĩko mã toto, mame Ritonõpo Imehxo Exikety mã moro pata rĩko jamihme. 
Ahno tõ esety merõko Ritonõpo mana; mokaro emero Jerusarẽ põkõme exĩko mã toto. 
Wãko mã toto, eremiãko roropa, ynara ãko mã toto: “Jerusarẽ pokoino kure rokẽ sytatose, atãkyemãko sytatose.”