ƐFƐSOFƆM.
2.
Saŋga bo am yo keteeri Nyɛmɛ nɔaniɛ na am yo satiɛ ni, am ti ka am awu wɔ. 
Nyini saŋga ni, am yo satiɛ kabo kisa durunya n nu­fɔm yo n wɔ. Na am sude Sitana bo i bita asiɛn ni aŋgoro afiɛn n yiko na am de i nɔaniɛ. Yiri bita minɛm kɛrɛ bo ba kete Nyɛmɛ nɔaniɛ n a. 
Nahɔrɛ, yɛrɛ mmɔɔ yo ti sɔ ɔ lɛɛ, na ya suyo dekem bo ya konviki wo bu nu, na ya suyo deke kɛrɛ bo i ti má kpa na ya ŋu i, na ya koro i ya sunsunni nu ni. Má ya kɛrɛ gusu di nyini wahara n bo Nyɛmɛ afa yaa ka i fa cin minɛm sui, bɛrɛ bo ba kete i nɔaniɛ n wɔ. 
Ama, Nyɛmɛ si aŋunfɔ agaya, na i kaaki koro ya agaya, 
ya yo ti ka ya wuuri wɔ, fa kɔ i nɔaniɛ n bo ya keteeri n su ni, haari ni nyini mmɔɔ, i koro n dɛɛ ti, wɔ saŋga ama ya ni Kristo ŋgɔɔ. I dɛɛ ahɔrɔma ni ma am nyaari tii­de a. 
Ya ni Yesu Kristo ayo kun n dɛɛ ti, Nyɛmɛ ateŋge ya yiwee nu kabo i teŋgeeri Kristo i yiwee n nu ni, na ya ni yiri kɛrɛ saŋga tana Nyɛmɛ fɛmɛya n nu. 
Deke bo i ti na Nyɛmɛ yoori sɔ n la ka, fa i kisa fa kɔ, i kére i ahɔrɔma n bo i la má aŋusu ni, yiri la kabo i ma Yesu Kristo ayo sakpa abuka ya barasu ni. 
Am yarada n bo am ayo i n dɛɛ ti, Nyɛmɛ ahɔrɔma ni ma am nyaari tii­de a, má am sakpa dɛɛ ti a, ama, Nyɛmɛ aceeri a. Nyini ti, má be se ka i fa fɔ. 
Kabo ya ti kisa ni, Nyɛmɛ yiiri ya sɔ a. Ya ni Kristo ayo kun n dɛɛ ti, ye wɔ ma ya ŋgɔɔ fɔfɔrɛ a, ka ya fa yo sakpa n bo Nyɛmɛ yo fa seeri ya ka ya yo i n a. 
Nyini ti, ambɛrɛ bo am ti má Yuda­fɔm ni, am teŋge su kabo am woo­wa yo ti barasu ni. Yuda­fɔm fere am ka tɔkurukum wɔ, na bu fere bu ŋu ka minɛm n bo ba wura kɛnkɛnnɛ, nyini n sɔ ti adamande aŋuniɛ­mbaa su yoo­wa a. 
Am teŋge su ka saŋga bo am yo si má Kristo ni, am wo dede ni yiri wɔ, na am ti má minɛ n bo Nyɛmɛ ayi bu n be. Sɛsɛ­su n bo Nyɛmɛ yo diiri i di seeri ka i búka i minɛm ni, am wo má nu. Am yo wo durunya n nu wɔ, ama, am yo la má ahoresi be, na am kaaki si má Nyɛmɛ. 
Ama, kisa, na am ni Yesu Kristo ayo kun ni, ambɛrɛ bo má am yo wo dede ni Nyɛmɛ ni, Kristo mbunja n bo i fiteeri i ŋuniɛ n nu, saŋga bo i wuuri ni, acin am adodo Nyɛmɛ a. 
Dama Kristo ti sɔnɔ bo wɔ ma ya sɛsɛ­su ni tana­laifiɛ a. Yiri yo faari i ŋu yoori yoo­wa yiiri kpɔ bo i ti ka kobe na i wo Yuda­fɔm, ni bo bu ti má Yuda­fɔm n afiɛn a, na wɔ yo bu kun. 
I yiwee n bo i wuuri i n dɛɛ ti, wɔ ma Nyɛmɛ nɔaniɛ kpamaa­wa n yo má juma kun, i ni i nɔaniɛ maa­wam, ni i atinm kɛrɛ. I yoori sɔ ɔ, adena i fa yɛrɛ Yuda­fɔm, ni bo bu ti má Yuda­fɔm n yo ya daanfiɛ kun. Ya ni yiri ayo kun n dɛɛ ti, ye wɔ sɛsɛ ya su ama ya tana­laifiɛ n a. 
I yiwee n bo i wuuri baka jaanu n su n dɛɛ ti, wɔ yi kpɔ bo má i wo ya afiɛn ni, ayo ya minɛ kunm akaaki ya aba Nyɛmɛ dɔ. 
Kristo ba kaanri labari kpa n bo i yo minɛm afiɛn dɔŋgu n maari ambɛrɛ bo am ti má Yuda­fɔm, na am wo dede ni Nyɛmɛ n wɔ, ni Yuda­fɔm bo bu dodo i ni. 
Kristo dɛɛ ti, ye Awiɛwiɛ Casi n ama ya ni bɛrɛ kɛrɛ atin ka ya koro ba ya Si Nyɛmɛ dɔ a. 
Nyini ti, ambɛrɛ bo am ti má Yuda­fɔm ni, kisa am ti má wɔfɔm kun Nyɛmɛ minɛm dɔ, ama, am anya atin abo Nyɛmɛ dɛɛ minɛm su, ye am ayo i dika­fɔm. 
Am kaaki ti ka sɔɔ n bo Nyɛmɛ suta i n wɔ, wɔ ta am ataka ataari fa bumboori see­wa n su, yiri la bo Kristo jaramasam, ni Nyɛmɛ nɔaniɛ kan­fɔm du mɔ fa seeri sɔɔ n bu ni. Nyini fa see­wa n la Nyɛmɛ nɔaniɛ n bo bu yo kaanri i n wɔ. Ye Yesu Kristo ti ka sɔɔ n jantaraka n a. 
Sɔɔ n deke n kɛrɛ wo yiri su a, ye i maari i yo woo­biri casi ma Nyɛmɛ a. 
Am ni yiri kɛrɛ ayo kun n dɛɛ ti, ambɛrɛ mmɔɔ ti Nyɛmɛ Seree­biri Awuru n wɔ lɛɛ, bo i Awiɛwiɛ Casi n wo nu ni.