Lolmav.
4.
Ngadao nail aqbhu Aqbhaqlaqhaq nail ganl khalhai ge heeq. Aivq-i mail ya phuq ya moel-a nail ganl neq, pul-nvq bhai gevq-ai thaq nail niil juq ngaol. 
Nl-a hal-a nail bhaqda nee, Aqbhaqlaqhaq tsaq nail daol nail tsaol-aq pevq lal-al nul neq, aivq neema eeq duq jiav nail ngaol. Thailhai ngaol-aoq, Miqyail nail sivtavq bhai aivq neema eeq duq maq jiav-ail. 
Jalliq lavqkhoel bhai khalhai gevq-ai thaq nail-aiq. “Aqbhaqlaqhaq Miqyail bhai neema thaqtsaol nail ngel-i mail, Miqyail aivq bhai tsaq nail daol nail tsaol-aq ngaol dai, saol-nvq-ai thaq nail ngaol” dai, gevq-ai thaq nail ngaol. 
Ganl nl nail tsaol-aq, yalgaq aqphoiq ya-u phao, yu aivq bhai kovpavq bivq lavq-a nail ngaol dai, teevq gaq-ail maq saol-nvq-ail. Aivq-i mail nl khi ya nail geel-nvq nail ngel-i mail, ya-a nail ngaol. 
Thailhai ngaol-aoq, nl nail hal nail phaq bhai maq juq dai, neema thaqtsaol nail tsaol-aq bhai tsaq nail daol nail tsaol-aq ngaol dai, Miqyail saol-nvq-ai thaq nail ngaol. Aivq-i mail nl-a hal-a nail bhaqda nee maq ngel-ail. Oeqbal aol nail tsaol-aq juq bhai tsaq nail daol nail tsaol-aq bhi pevq lal nia nail Miqyail bhai, aqyu juq neema thaqtsaol nail ngel-i mail ngaol. 
Tsaol-aq teevq gaq nl nail hal nail bhai maq tavq-ail, Miqyail aivq bhai tsaq nail daol nail tsaol-aq ngaol dai, saol-nvq bhiq haq neq, geeqlaoq eeq nail ngaol. Heeqphaq Daqbhil iqsanl, alhai ge-ai thaq nail ngaol. 
Aivq ge nail: “Tsaol-aq khul gaq bhai maqkhaiq, nl bheeq-a nail phaq bhai Miqyail oeqbal phaiq bhiq khi aivq nail oeqbal bhai lav peivq gil bhiq haq neq, tsaol-aq al gaq geeqlaoq eeq nail ngaol. 
Tsaol-aq teevq gaq nail kovtavq bhai Heeqphaq Miqyail oeqbal maq thaq haq neq, tsaol-aq al gaq geeqlaoq eeq nail ngaol” dai, ge-ai thaq nail ngaol. 
Thailhai phal-iq neq, bavkov uqjaq oev nail aol thaoq nail tsaol-aq taivq-ail geeqlaoq al ya nail laiq. Maq ngel haq neq, aol al maq thaoq nail tsaol-aq iqsanl ya naol laiq. Khul khi mail dai ngal-aq neq, Aqbhaqlaqhaq neema thaqtsaol nail ngel-i mail, Miqyail aivq bhai tsaq nail daol nail tsaol-aq ngaol dai, saol-nvq-ai thaq nail bhai ngadao heeq kivq nail ngaol. 
Miqyail aivq bhai alhai khaq mao saol-nvq bhiq-a nail-aiq. Bavkov uqjaq oev nail aol nl gaq khi mail laiq. Maq ngel haq neq, maq nl-u nee mail laiq. Bavkov uqjaq oev nail aol nl gaq khi mail maq ngel-ail. Maq nl-u nee mail saol-nvq bhiq-a nail ngaol. 
Aqbhaqlaqhaq neema thaqtsaol nail ngel-i mail, bavkov uqjaq oev nail aol maq nl-u nee mail tsaq nail daol nail tsaol-aq pevq lal-a nail ngaol. Aivq tsaq nail daol nail tsaol-aq pevq lal-aoq nail ngaol dai, bhaqlaoq kheq dai bhi dov lal nail dai khi, bavkov uqjaq oev nail aol nl-a nail ngaol. Bavkov uqjaq oev nail aol maq nl khi ngaol-aoq, neema thaqtsaol nail ngel-i mail, tsaq nail daol nail tsaol-aq pevq lal-a nail tsaol-aq iqsanl nail aqbhu gaq pevq lal-a nail ngaol. 
Aqbhaqlaqhaq aivq bavkov uqjaq maq oev-u nee mail, khal doevq-ail ceevq-a nail khe-ai, neema thaqtsaol thaqtsaol-ail doevq nail bavkov uqjaq oev-a nail tsaol-aq juq nail aqbhu gaq iqsanl pevq nail ngaol. 
Miltsaq niil iqsanl, Aqbhaqlaqhaq khi mail, aivq nail aqjievq lilheel bhai jaiqbhoil bivq naol dai, Miqyail saljial jaq-u phao, Aqbhaqlaqhaq aoldaoq kovqdaoq nail haoqnao tsaothe-a nail ngel-i mail, jaq-a nail maq ngel-ail. Thailhai ngaol-aoq, aivq neema thaqtsaol khi, Miqyail aivq-i mail tsaq nail daol nail tsaol-aq bhi pevq lal-a nail ngel-i mail ngaol. 
Khul khi mail dai ngal-aq neq, aoldaoq kovqdaoq bhai juq nail tsaol-aq jaiqbhoil ovq haq neq, neema thaqtsaol nail phaq neq, khul nail ganl maq tsoiq-ail. Daoqma saljial al iqsanl khul nail ganl maq tsoiq-ail. 
Aoldaoq kovqdaoq neq, Miqyail neema phail nail phaq bhi kev lee nail ngaol. Thailhai ngaol-aoq, aoldaoq kovqdaoq maq jiav-ail nul neq, aoldaoq kovqdaoq bhai nl laiq nail phaq iqsanl maq jiav-ail. 
Alheel ngel-i mail, daoqma saljial bhai ya nia dai neq, neema thaqtsaol nail phaq bhai tavq nail ngaol. Khul khi mail dai ngal-aq neq, geeqlaoq eeljaol bhaqda nee ya nail ngaol. Aqbhaqlaqhaq nail aqjieivq lilheel juq iqsanl daoqma saljial maldil ya-a nail ngaol. Aoldaoq kovqdaoq jiav nail Yuldav nail tsaol-aq juq taivq-ail ya-a nail maq ngel-ail. Ngadao juq iqsanl nail aqbhu Aqbhaqlaqhaq neema thaqtsaol nail khe-ai, khal thaqtsaol nail tsaol-aq iqsanl mail ya nail ngaol. 
Aivq nail ganl Jalliq lavqkhoel bhai gevq-ai thaq nail khe-ai: “Ngal naoq bhai jeq-e jaq-a maodai nail aqbhu bhi pevq lal naol” dai, gevq-ai thaq nail ngaol. Aqbhaqlaqhaq neq, aivq neema thaqtsaol nail Miqyail nail sivtavq bhai saljial ya-a nail ngaol. Miqyail al gaq neq, sil-a nail tsaol-aq bhai gaoq bhi doevq kovq lal nia nail nee ovqtavq, maq jiav nail phaq bhai iqsanl bhi jiav lal nia nail gaq ngaol. 
Jeq-e jaq-a maodai nail aqbhu pevq lal dai, noeqthunq duq maq jiav khi ngaol-aoq, Aqbhaqlaqhaq neema thaqtsaol khi noeqthunq nail ngaol. Khul khi mail dai ngal-aq neq, “Naoq nail aqjievq lilheel nqtavq khe tsaiq nail aqgil khe-ai mao lal naol” dai, Miqyail aivq bhai ge bhiq-ai thaq nail ngaol. 
Aqbhaqlaqhaq aivq nail aqmaol bhai saol-nvq khi, aivq teevq yal kovq niidai bhee lal-a nail ngel-i mail, yeel gil lai nail aqjail jail lal-aoq nail ngaol. Al ovqtavq Saqlal iqsanl yaq jaol lee nail yanq jel-ail khi ngaol-aoq, Aqbhaqlaqhaq neema thaqtsaol nail phao gaq maq bhaq-ail. 
Miqyail-i mail saljial jaq-ai thaq nail bhai, aivq pov pov lav lav-ail maq noeq dai, neema thaqtsaol nail phaq gaq kav lal khi Miqyail bhai tsiqeeq-a nail ngaol. 
Saljial jaq-ai thaq nail khe-ai, Miqyail nl nia nail ngaol dai, Aqbhaqlaqhaq ivqdao dai, neema thaqtsaol nail ngaol. 
Aivq alhai neema thaqtsaol nail ngel-i mail, “Naol tsaq nail daol nail tsaol-aq ngaol” dai, Miqyail aivq bhai saol-nvq-ai thaq nail ngaol. 
Thailhai ngaol-aoq, aivq alhai saol-nvq-ai thaq nail ngaol dai, gevq-ai thaq nail daoq al daoq neq, Aqbhaqlaqhaq nail haqbhoil teevq-eel maq ngel-ail. 
Ngadao juq nail haqbhoil iqsanl gevq-ai thaq nail ngaol. Ngadao nail Heeqphaq Yeiqsul bhai gaoq bhi doevq kovq lal-a nail gaq bhai ngadao neema thaqtsaol haq neq, ngadao bhai iqsanl tsaq nail daol nail tsaol-aq ngaol dai, Miqyail saol-nvq lavq nail ngaol. 
Ngadao-i mail nl laiq-a nail oeqbal bhaqda nee Yeiqsul bhai tavq heivq-a nail ngaol. Thailhai ngaol-aoq, ngadao Miqyail nail sivtavq bhai tsaq nail daol nail tsaol-aq pevq lal dai, aivq gaoq doevq kovq lal-a nail ngaol.