Lulkavq-i mail gevq-a nail lavqkhiq tsail nail geeqlaoq daoq.
1.
Eeqnail heelnail Thaolphilluv-ol, nvjuq nail lavqkhoel bhai pevq lal-a nail, Yeiqsul-i mail ganl nl-a nail juq bhai, tsaol-aq mee nia gaq khal khi kivq nail khe-ai, ganl al juq bhai haoqgavq gevq dov gaq-ai thaq nail ngaol. 
Yeiqsul-i mail nl-a nail ganl al juq bhai, iqmoeq-u phao nee ya moel thaq nail juq khi geeqlaoq daoq cavq nail juq-i mail, khal ge lavq-a nail khe-ai, aqyu juq gevq thaq-ai thaq nail ngaol. 
Ngal iqsanl iqmoeq-u phao nee Yeiqsul-i mail nl-a nail ganl al juq bhai aqmeeq-ai tsaotsel duq-ai thaq nail ngaol. 
Alheel ngel-i mail, naoq-i mail ya saol-a nail juq neq, maldil tsaq-ail nial dai, naol iqsanl heeq nia dai, Yeiqsul-i mail nl-a nail ganl al juq teevq phaq gil-aq teevq phaq naoq bhai gevq bhoel-ai leevq nail neq, tsaq nail ngaol dai, ngal noeq nail ngaol. 
Yuldav milkhaoq bhai heeqphaq Heiqlol uvthaiq thaq-u phao, Aqbhilyav nail munl lavqkhoel bhai Saqkhaqlil dai khul nail Philma teevq gaq jaol nail ngaol. Aivq nail khaqma neq, Eillilsaqbhail dai, khul nail ngaol. Aqyu nvq maolyaq neq, Aqloq nail jeq-e jaq-a pevq nail ngaol. 
Aqyu nvq maolyaq neq, Miqyail nail sivtavq bhai daolcoev dai doevq khi, Miqyail nail aoldaoq kovqdaoq khi mail aolsaolkovq iqsanl bhai tsaothe nail ngaol. 
Eillilsaqbhail neq, maq bhao aqma pevq nail ngel-i mail, aqyu nvq maolyaq yaq maq jaol-ail, nvq gaq nvq gaq-ail joiqmaoq maoq lai-aoq nail ngaol. 
Teevq n kev lee-al ngal-aq neq, Philma nail ganl nl nail haqbhoil, Saqkhaqlil nail munl bhai dol lee-a nail ngel-i mail, uqhuq thaoq nail ilkhaol il ma nail lavqkhoel bhai ganl nl nail ngaol. 
Philma juq nail aol jiav nail khe-ai, ganl bhoil-u phao, Miqyail nail uqhuq thaoq nail ilkhaol il ma bhai aol lai khi, huqbhiq nil nail phaq tovq khi danq nail ganl al, Saqkhaqlil bhai tsaq lai-a nail ngaol. 
Saqkhaqlil huqbhiq nil nail phaq tovq khi danq thailthaiq-u phao, lavqniil phao jaol-ail ceevq-a nail tsaol-aq munl munl ma juq iqsanl mail, geeqlaoq hal nail ngaol. 
Aq-u phao, Heeqphaq Miqyail nail nqtavq gaqkhoel teevq gaq, Saqkhaqlil nail sivtavq bhai dov lee khi, huqbhiq nil nail phaq tovq khi danq duq nail lavqmal phao, thulphaol lee-a nail ngaol. 
Saqkhaqlil nqtavq gaqkhoel al gaq bhai ya moel-u phao, neema lavqkhoel bhai bhaq dai-ail khi, deel-nq deedee ail-a nail ngaol. 
Thailhai ngaol-aoq, nqtavq gaqkhoel aivq bhai ge bhiq-a nail: “Yaqkhaqlil-ol, thaq geesil. Khul khi mail dai ngal-aq neq, naoq nail geeqlaoq hal daoq bhai Miqyail gaiq-ao nail ngaol. Naoq nail khaqma Eillilsaqbhail naoq nail haqbhoil, yaqyov teevq gaq tsiq nail ngaol. Naol yaqyov al gaq bhai Yaolhaq dai ya mil bhiq nail ngaol. 
Yaq al gaq doevq lee-a nail ngel-i mail, naol lavqkhiq tsail deedee nail ngaol. Tsaol-aq maodai iqsanl, lavqkhiq tsail nail ngaol. 
Khul khi mail dai ngal-aq neq, aivq neq, Heeqphaq Miqyail nail sivtavq bhai eeq nail heel nail gaq pevq lal nail ngaol. Aivq neq, jilpheeq khi mail bov lal nail phaq teevq peivq-ail maq daol-ail. Aqma nail ovqmav lavqkhoel bhai aol-u phao nee mail, Meeqnail Haolnail Aqhaqlal teevq bhee aol nail ngaol. 
Ilsaqleiqlal nail tsaol-aq maodai bhai, aqyu juq nail Heeqphaq Miqyail jaol nail phao, aivq hevqkol lavq nail ngaol. 
Yaolhaq neq, Eillilya nail neema khi bhaqaoq aol nail lavqkhoel, Heeqphaq nail iqmoeq ail nail ngaol. Aqbhu khi yaq tsaq lai jil lai dai maqkhaiq, naqlaiq laiq nail tsaol-aq, tsaq nail daol nail tsaol-aq nail neenoeq neekha nail haoqnao tsaothe dai maqkhaiq, Miqyail nail haqbhoil lainq-ai thaq nail jeq-e teevq jeq-e pevq lal dai maqkhaiq, Yaolhaq nl nail ngaol” dai, nqtavq gaqkhoel aivq bhai ge bhiq-a nail ngaol. 
Saqkhaqlil ge nail: “Alhai pevq lal naol dai, ngal khalhai khi ya heeq kivq nail-aiq. Ngal maoq lee-aoq nail ngaol. Ngaq nail khaqma iqsanl maoq lee-aoq nail ngaol” dai, nqtavq gaqkhoel bhai ge bhiq-a nail ngaol. 
Nqtavq gaqkhoel al gaq gaoq ge nail: “Ngal neq, Miqyail nail sivtavq bhai thulphaol khi, Miqyail nail khillavq Gaqbheiqlal ngaol. Lavqkhiq tsail nail daoq niil daoq cavq gaiq ail yaoq dai, Miqyail ngaq bhai khoel-ai leevq-a nail ngaol. 
Naol ngaq nail daoq bhai, ‘maq pevq lal nia-ail’ dai, neema lavqkhoel bhai noeq nail ngel-i mail, naoq nail yaqyov maq doevq lee-u kev dai, naol daoq maq ge nia mail, aqtsi tsu dai, ya jaol nail ngaol. Ngaq-i mail ge nail daoq niil daoq, aqyanq tsaq lal haq neq, pevq lal nail ngaol” dai, aivq bhai ge bhiq-a nail ngaol. 
Aq-u phao, tsaol-aq al juq lavqniil-ai Saqkhaqlil bhai daonq nail ngaol. Khul khi mail dai ngal-aq neq, aivq uqhuq thaoq nail ilkhaol il ma nail lavqkhoel bhai tsaq dai maq lai-a nail ngel-i mail, aqyu juq noeq-u maq dov dai, pevq ail-a nail ngaol. 
Aivq dov lee-u phao, aqyu juq bhai daoq maq ge tsaoq bhiq nia dai, pevq ail-a nail ngel-i mail, aivq uqhuq thaoq nail ilkhaol il ma nail lavqkhoel bhai phaodaiq bhiq thaq nail teevq phaq ganav bhai, ya moel thaq nail ngaol dai, aqyu juq heeq nia-a nail ngaol. Aivq daoq maq ge nia-ail pevq-ail khi, aqyu juq bhai aqlavq-i mail dao bhiq-a nail ngaol. 
Uqhuq thaoq nail ilkhaol il ma nail lavqkhoel bhai, aivq nail ganl nl nail aqyanq jel ail-u phao, Saqkhaqlil ilkhaol bha kovq ail-a nail ngaol. 
A bhai nee ngal-aq, aivq nail khaqma Eillilsaqbhail neq, yaq ceiv lai khi, bhala ngaq heeq bhee dai, khaq bha iqsanl maq dov ail dai, ilkhaol bhai jaol nail ngaol. 
Eillilsaqbhail ge nail: “Miqyail ngaq bhai heldaiq lavq khi geeqlaoq bhiq lavq-a nail ngaol. Niai nee pultavq neq, tsaol-aq yaq ngaq bhai ge doil lavq nail phaq bhai, aivq oil ha lavq-a nail ngaol” dai, ge nail ngaol. 
Eillilsaqbhail aqhaq aqmaol liq lai-a nail bhala kovq heeq bhee lal-u phao, Gaqliqlail milkhaoq Naqsaqlail meenq bhai jaol nail yaqmai-aq teevq gaq jaol nail bhai, Miqyail nail nqtavq gaqkhoel Gaqbheiqlal bhai khoel gai-aivq-a nail ngaol. 
Yaqmai-aq al gaq, Daqbhil nail jeq-e jaq-a Yaolsai dai mil-ai thaq nail gaq bhai maol ail naol dai, ge ceiv-ai thaq nail, haoltaiv deel yaqmai-aq yaqnoil ngaol. Aivq nail aqmil neq, Maqlil ngaol. 
Nqtavq gaqkhoel al gaq, aivq jaol nail bha lee khi ge nail: “Geeqlaoq eeljaol ya-a nail yaqmiq-ol, naol geeqlaoq eeq dei-eiq. Heeqphaq Miqyail naoq-ai nee mail jaol nail ngaol” dai, ge bhiq-a nail ngaol. 
Maqlil neq, daoq al daoq bhaqda nee, neema lavqkhoel bhai suqsaq lal khi, “Daoq ge tsaoq lavq-a nail niil khalhai ge movq nail meeq” dai, saol-nvq nail ngaol. 
Aq-u phao, nqtavq gaqkhoel aivq bhai ge bhiq-a nail: “Maqlil-ol, thaq geesil. Khul khi mail dai ngal-aq neq, Miqyail naoq bhai geeqlaoq eeljaol bivq nail dai khi, tsel dov-ai thaq nail ngaol. 
Heldaiq dei-eiq. Naol yaq ceiv lai khi, yaqyov teevq gaq ya tsiq nail ngaol. Aivq bhai, naol Yeiqsul dai, ya mil bhiq nail ngaol. 
Yaqyov al gaq eeq dee heel deedee khi, eeq nail heel nail gaq nail Yaqyov dai, yu khul nail ngaol. Heeqphaq Miqyail Yaqyov al gaq bhai heeqphaq Daqbhil nail joiqjaq doiqbev bev ma bhai, bhi jaoldeel nail ngaol. 
Aivq neq, Yaqkov nail jeq-e jaq-a nail kovtavq bhai Heeqphaq jiovq khi, aivq uvthaiq nail milkhaoq al neq, nqmaq maqluv halyeel loi lai nail maq bhao-ail” dai, Maqlil bhai ge bhiq-a nail ngaol. 
Maqlil nqtavq gaqkhoel bhai ge bhiq-a nail: “Ngal yovjil maq bhao, naol ge nail khe-ai khalhai khi pevq lal nia nail-aiq” dai, ge kovq bhiq-a nail ngaol. 
Nqtavq gaqkhoel Maqlil bhai ge bhiq-a nail: “Meeqnail Haolnail Aqhaqlal naoq nail kovtavq bhai yavq kha lee khi, eeq dee heel deedee nail Miqyail nail bhaqaoq, naoq bhai uvthaiq lee nail ngaol. Alheel ngel-i mail, doevq lee nail meeq nail haol nail yaqyov al gaq bhai, Miqyail nail Yaqyov dai, yu khul nail ngaol. 
Maq bhao aqma dai saol-nvq-ai thaq nail, naoq nail jeq-e jaq-a Eillilsaqbhail bhai heldaiq. Joiqmaoq maoq lai khi ngaol-aoq, yaq ceiv lai-a nail bhala kovq heeq bhee lal-aoq nail ngaol. 
Miqyail maq nl nia nail teevq phaq iqsanl maq jiav-ail” dai, Maqlil bhai ge bhiq-a nail ngaol. 
Maqlil ge nail: “Ngal neq, Miqyail nail yaqkav ngaol. Naoq-i mail ge nail khe-ai, ngaq bhai kev lee dei-eiq” dai, ge bhiq-a nail ngaol. A bhai nee ngal-aq, nqtavq gaqkhoel aivq jaol nail nee dov ail-a nail ngaol. 
A bhai nee ngal-aq, Maqlil dov ail khi, Yuldav milkhaoq daoltavq phao jiav nail meenq teevq meenq bhai, lavqtsail mail lai-a nail ngaol. 
Aivq Saqkhaqlil nail ilkhaol bhai aol lai khi, Eillilsaqbhail bhai daoq tsaoq phuq-a nail ngaol. 
Eillilsaqbhail Maqlil-i mail daoq tsaoq phuq nail daoq ya gaiq-u phao, aivq nail ovqmav lavqkhoel khe yaq, luv luv dai tev lal-a nail ngaol. A bhai nee ngal-aq, Eillilsaqbhail Meeqnail Haolnail Aqhaqlal bhee lal khi, 
aivq mailma-ail ge nail: “Naol neq, yaqmai-aq juq nail lavqkhoel bhai neq, geeqlaoq eeq deedee nail gaq ngaol. Naoq nail ovqmav lavqkhoel khe yaq iqsanl, geeqlaoq eeq deedee nail ngaol. 
Ngaq nail Heeqphaq nail aqma, ngal jaol nail bha lal-a nail geeqlaoq, khul khi mail ngal ya-a nail ngel-ail. 
Heldaiq daiq. Naol daoq thaoqphuq nail daoq bhai ngal ya gaiq-u phao, ngaq nail ovqmav lavqkhoel khe yaq lavqkhiq tsail deedee nail ngel-i mail, luv luv-ai tev lal-a nail ngaol. 
Naol neq, geeqlaoq eeq nail yaqmai-aq ngaol. Khul khi mail dai ngal-aq neq, Miqyail-i mail ge-ai thaq nail daoq maldil bhee lal naol dai, neema thaqtsaol nail ngel-i mail ngaol” dai, ge bhiq-a nail ngaol. 
Aq-u phao Maqlil ge nail: “Ngaq nail neema lavqkhoel nee Heeqphaq Miqyail bhai tsiq eeq tsiq heel naol. 
Ngaq nail aqhaqlal iqsanl, ngaq bhai hevqkovq lavq-a nail Miqyail bhaqda nee lavqkhiq tsail deedee-ail nial. 
Khul khi mail dai ngal-aq neq, teevq peivq-ail khaoqsail maq jiav nail aivq nail yaqkav bhai aivq gaoqhaq lavq khi, heldaiq lavq-a nail ngaol. Niai nee pultavq neq, teevq yeel nee teevq yeel, ngaq bhai geeqlaoq eeq nail yaqmai-aq dai, yu khul nail ngaol. 
Khul khi mail dai ngal-aq neq, bhaqaoq eeq nail Miqyail neq, ngaq bhai eeq dee meeq deedee nail phaq nl lavq-a nail ngaol. Aivq neq, meeq dee haol deedee nail ngaol. 
Aivq bhai ev nail tsaol-aq bhai, aivq gaoqhaq gaiq-a nail teevq yeel nee teevq yeel jiav nail ngaol. 
Miqyail aivq nail aqlavq-i mail bhaqaoq eeq nail juq nl nail ngaol. Yovqgavq nail neekhaol taivq-ail nl khi, neema eeq nail heel nail tsaol-aq bhai, aivq lav luq lav seil bhiq nail ngaol. 
Aivq heeqphaq juq bhai aqyu juq-i mail jaoldeel-nvq thaq nail doiqbev bev ma nee tsiqkha khi, khaoqsail maq jiav nail neema thaqtheq nail phaq aol nail tsaol-aq bhai, thaqeeq thaqheel bhiq nail ngaol. 
Aivq moevq nail sivq nail tsaol-aq bhai aqmeeq phaq teevq bov bhi jaq khi, hulmeeq hulbhao juq bhai neq, aqnieivq-ail bhi dov ail nail ngaol. 
Aivq ngadao nail aqphiq aqbhal juq bhai ge bhiq-ai thaq nail khe-ai, ‘Aqbhaqlaqhaq nee mail, aivq nail aqjievq lilheel bhai kev dai, nqmaq maqluv halyeel maq nioilpeivq mail, gaoqhaq naol’ dai, ge khi, aivq aivq nail yaqkav Ilsaqleiqlal nail jeq-e bhai heldaiq bhiq-a nail ngaol” dai, ge bhiq-a nail ngaol. 
Maqlil neq, Eillilsaqbhail nee mail bhala hail heeq bhee dai jaol khi, aivq nail ilkhaol bhai kovq ail-a nail ngaol. 
Eillilsaqbhail yaq bhao nail yanq tsaq lal khi, bhao-a nail ngaol. Yaq al gaq neq, yaqyov ngaol. 
Miqyail aivq bhai eeq dee meeq deedee nail geeqlaoq nl bhiq-a nail ganl al, aqjail bhai jaol nail juq khi mail aivq nail aqivq jaqbheq juq ya gaiq-u phao, aqyu juq iqsanl teevq gaq khe-ai, lavqkhiq tsao tsail nail ngaol. 
Eivq n bhee lal-u phao, yaq al gaq bhai bavkov uqjaq oev bhiq nail dai khi, aqyu juq bhoi lal jil lal-a nail ngaol. Yaq al gaq bhai aivq nail aqbhu nail aqmil khe-ai, Saqkhaqlil dai mil bhiq nail dai khi, lainq-ai thaq nail ngaol. 
Aq-u phao, aqma gaq ge nail: “Maq ngel-ail. Aivq bhai Yaolhaq dai, ya mil bhiq naol” dai, ge bhiq-a nail ngaol. 
“Naoq nail jeq-e jaq-a nail lavqkhoel, Yaolhaq dai mil-ai thaq nail teevq gaq gail maq jaol-ail” dai, aqyu juq aivq bhai ge bhiq-a nail ngaol. 
Aq-u phao, yaq al gaq bhai, khalhai bhi mil bhiq movq nail-aiq dai, aqyu juq aqbhu gaq bhai aqlavq dao bhiq-a nail ngaol. 
Aqbhu gaq neq, haoqgavq gevq nail dailpav hal khi, aivq nail yaqyov nail aqmil neq, Yaolhaq ngaol dai, gevq daiq bhiq-u phao, aqyu juq iqsanl mail noeq-u maq dov dai, pevq ail-a nail ngaol. 
Aq-u phao, teevq pov taivq-ail, aivq daoq ge nia lal-a nail ngaol. A bhai nee ngal-aq, aivq daoq ge ge-ail, Miqyail bhai tsiqeeq-a nail ngaol. 
Aqjail bhai jaol nail tsaol-aq iqsanl mail ya moel-u phao, geesil nail ngaol. Ganl al, Yuldav milkhaoq daoltavq bha doi dai, gaiq doi ail-a nail ngaol. 
Khal ya gaiq-a nail tsaol-aq iqsanl mail, yovqgavq nail neema lavqkhoel-ai yovqgavq noeq thaq-ai thaq khi, “Yaq niil gaq, khalheel nail tsaol-aq pevq lal nail maq heeq laq” dai, aqyu juq nail gaiqlaq bhai ge pheeljaq nail ngaol. Khul khi mail dai ngal-aq neq, Miqyail nail bhaqaoq aivq nail kovtavq bhai jiav nail ngaol. 
Aq-u phao, Yaolhaq nail aqbhu Yaqkhaqlil, Meeqnail Haolnail Aqhaqlal bhee lal khi, Miqyail nail daoq niailhai gedan-a nail ngaol: 
“Ilsaqleiqlal nail Heeqphaq Miqyail bhai tsiqeeq yaoq. Khul khi mail dai ngal-aq neq, aivq aivq nail yaqkav Daqbhil nail jeq-e lavqkhoel khe, ngadao nail haqbhoil bhaqaoq eeq deedee nail Hevqkovq nail gaq bhi dov lee-a nail ngaol. Aivq aivq nail jeq-e jaq-a bhai heldaiq lee khi hevqkovq-a nail ngaol. 
Miqyail alhai nl-a nail neq, milnee uqnee nee aivq nail haqbhoil gedan nail meeq nail haol nail juq bhai juq khi ge-ai thaq nail khe-ai, nl-a nail ngaol. 
Aivq ngadao bhai neejiav jiav nail tsaol-aq juq nail lavqkhoel nee maqkhaiq, ngadao bhai maq heldaiq nul nail tsaol-aq juq nail lavqkhoel nee maqkhaiq, ngadao bhai hevqkovq nail khi nl-a nail ngaol. 
Aivq niailhai nl-u phao, ngadao nail aqphiq aqbhal juq bhai gaoqhaq gaiq-a nail lavqkhoel nee nl-a nail ngaol. Aivq nail meeq nail haol nail daoqma saljial bhai iqsanl, noeq kev khi nl-a nail ngaol. 
Daoqma saljial al daoq neq, ngadao nail aqbhu Aqbhaqlaqhaq bhai Miqyail aivq-i mail khanq-ai thaq nail daoqma saljial al daoq ngaol. 
Daoqma saljial al bhaqda nee, ngadao bhai neejiav jiav nail tsaol-aq juq nail lavqkhoel nee ngadao ya jel-ail khi, ngadao nail yeel gil-u kev dai, meeq nail haol nail tsaq nail daol nail lavqkhoel nee, Miqyail nail sivtavq bhai maq ya geesil dai, ngadao ganl nl kivq nail ngaol. 
Ngaq nail yaqyov-ol, naoq bhai eeq dee heel deedee nail Miqyail nail haqbhoil gedan nail gaq nial dai, yu khul naol. Naol neq, Heeqphaq nail iqmoeq ya ail khi aivq nail gailkhaol ya lav daol-ail nail ngaol. 
Khul khi mail dai ngal-aq neq, ngadao nail Miqyail neq, gaoqhaq gaiq-a nia deedee nail ngaol. Alheel ngel-i mail, hevqkovq nail phaq neq, oeqbal phaiq bhiq-a nail lavqkhoel nee dov lee-a nail ngaol dai, aivq nail jeq-e jaq-a bhai bhiq heeq nia dai, 
nqtavq kovtavq khe aqbhaq ngadao nail kovtavq bhai bhaq lee-u phao, aqnav nail lavqkhoel bhai jaol nail tsaol-aq khi sil nail phaq nail kov-uvq bhai jaol nail tsaol-aq bhai iqsanl, aqbhaq bhaq bhiq khi, neesal-ovq nail gailkhaol bhai hevqdaiq lavq naol” dai, Saqkhaqlil ge nail ngaol. 
Yaq al gaq aqmaol phao eeq lal heel lal khi, aqhaqlal phao iqsanl, eeq lal heel lal-a nail ngaol. Aivq Ilsaqleiqlal tsaol-aq nail sivtavq bhai maq dov lal-u phao, haqtsoiq haqyal bhai taivq-ail jaol-a nail ngaol.